Xabar berganimizdek, joriy yilning 13-16 sentabr kunlari Korrupsiyaga qarshi kurashish agentligi direktori boshchiligidagi Oʻzbekiston delegatsiyasining Yaponiyaga tashrifi amalga oshirildi.

Tashrifning maqsadi ikki davlat vakolatli idoralari oʻrtasida hamkorlik aloqalarini oʻrnatish hamda istiqbolda oʻzaro tajriba almashishning aniq mexanizmlarini muhokama qilishdan iborat boʻldi.

Shu maqsadda Yaponiyada korrupsiyaga qarshi kurashish sohasida faoliyat yurituvchi davlat idoralari, xalqaro tashkilotlar va taʼlim muassasalari rahbarlari bilan uchrashuvlar tashkil etildi.

Xususan, joriy yilning 13-sentabr kuni A.Burxanov hamda Yaponiyaning Nagoya universiteti Prezidenti N.Sugiyama, (Nagoya universitetining sobiq prezidenti) Tokay milliy oliy taʼlim va tadqiqot muassasalari konsorsiumi raisi S.Matsuo, Nagoya iqtisodiyot universiteti prezidenti X.Saburi, shuningdek, Osiyo huquqiy almashinuv markazi (CALE) direktori D.Yokomizo bilan uchrashuvlar boʻlib oʻtdi.

Maʼlumot uchun: Nagoya universiteti mamlakatdagi 775 ta milliy, davlat va xususiy oliy taʼlim muassasalari orasida eng yaxshi oʻnta universitetlardan biri hisoblanadi. Universitet dunyoning nufuzli OTMlari reytingida 112-oʻrinda, Osiyoda esa 28-oʻrinda turadi.

CALE Osiyo mamlakatlariga davlat qurilishi jarayonini samarali amalga oshirish uchun huquqiy tizimlarni yaratishda yordam beradi. Shu munosabat bilan Markaz Yaponiya hukumati bilan hamkorlikda huquqiy yordam koʻrsatish loyihalarini ishlab chiqmoqda.

Muloqot chogʻida Agentlik direktori Yaponiya universitetlari ekspert va professorlarini jalb qilgan holda korrupsiyaga qarshi kurashish va davlat xizmatchilarining bu boradagi bilimlarini oshirish boʻyicha seminar va treninglar oʻtkazish, Oʻzbekistonda tashkil etilishi rejalashtirilayotgan Korrupsiyaga qarshi virtual akademiya faoliyatini qoʻllab-quvvatlash, Yaponiyada qisqa muddatli oʻquv kurslari orqali davlat xizmatchilarining malakasini oshirish kabi yoʻnalishlarda hamkorlik oʻrnatish boʻyicha kelishuvlarga erishildi.

Shuningdek, Yaponiyaning ilmiy akademik doira vakillari uchun Oʻzbekistonda amalga oshirilayotgan aksilkorrupsiya siyosati toʻgʻrisida maxsus taqdimot oʻtkazildi.

14-sentabr kuni Yaponiya xalqaro hamkorlik agentligi (JICA) vitse-prezidenti K.Nakazava bilan boʻlib oʻtgan muloqotda esa Agentlik va JICA oʻrtasida sogʻliqni saqlash sohasida korrupsiyaning oldini olish va unga qarshi kurashish boʻyicha qoʻshma loyihani ishlab chiqish, loyiha doirasida korrupsiyaga qarshi samarali kurashishga oid qonunchilikni takomillashtirish, korrupsiyaga qarshi kurashish boʻyicha hududiy kengashlar faoliyatini baholashni nazarda tutuvchi elektron platformani yaratish kabi masalalarda oʻzaro hamkorlik qilishga kelishib olindi.

Shu kuni Agentlik direktori Yaponiyaning Parlament tashqi ishlar vaziri Yu.Yoshikava, Milliy kadrlar boshqarmasi (NPA) boshligʻi Yu.Kamovoto bilan ham uchrashdi.

Ushbu muloqotlarda yapon tomoni Oʻzbekistonda korrupsiyaga qarshi kurashish sohasida amalga oshirilayotgan islohotlarni yuqori baholab, koʻrilayotgan choralarni qoʻllab-quvvatlashga va bu borada yaqindan hamkorlik qilishga tayyor ekanliklarini bildirishdi. Jumladan, Yaponiya Milliy kadrlar boshqarmasi bilan hamkorlikda Oʻzbekistonda davlat xizmatchilarida halollik vaksinasini joriy qilish boʻyicha maxsus qoʻllanma yaratishga kelishildi.

Maʼlumot uchun: Yaponiyada Milliy davlat xizmatchilari konstitutsiyada “butun xalqning xizmatkorlari” sifatida belgilangan boʻlib, ular oʻz vazifalarini ogʻishmay, adolatli bajarishga mutlaqo majburdirlar. “Davlat xizmati toʻgʻrisida”gi milliy qonunga muvofiq, NPA kadrlarni boshqarishda adolatni taʼminlash va davlat xizmatchilarining huquqlarini himoya qilish uchun masʼul boʻlgan betaraf va ixtisoslashgan tashkilot sifatida tashkil etilgan.

15-sentabr kuni Yaponiya adliya vaziri X.Yasuxiro, Bosh prokuror Yu.Kai hamda Milliy politsiya agentligi bosh komissari oʻrinbosari Y.Ogata bilan oʻtkazilgan uchrashuvlarda qonun hujjatlarining korrupsiyaga qarshi ekspertizasini oʻtkazish, davlat organlari faoliyatida korrupsiya xavfini baholash, fuqarolarning murojaatlari bilan ishlash va ularning huquqlarini himoya qilish, korrupsiyaning sabablari va uni keltirib chiqaruvchi omillarni aniqlash hamda ushbu jarayonlarda axborot texnologiyalaridan foydalanish borasida doimiy hamkorlik aloqalarini oʻrnatish boʻyicha kelishuvlarga erishildi.

Uchrashuvda, shuningdek, davlat organlarining korrupsiyaga qarshi kurashish faoliyatini muvofiqlashtirish tizimi, milliy qonunchilikka korrupsiyaga qarshi kurashishning xalqaro standartlarini joriy etish, nodavlat sektor va akademik doiralar bilan oʻzaro hamkorlik masalalariga ham alohida eʼtibor qaratildi.

16-sentabr kuni Agentlik direktori BMT Jinoyatchilikning oldini olish va huquqbuzarlar bilan shugʻullanish boʻyicha Osiyo va Uzoq Sharq instituti (UNAFEI) direktori oʻrinbosari D.Irei bilan uchrashdi.

Maʼlumot uchun: UNAFEI 2007-yildan buyon Janubi-Sharqiy Osiyo mamlakatlarida qonun ustuvorligi va yaxshi boshqaruvni ilgari surish maqsadida “Yaxshi boshqaruv seminari” deb nomlanuvchi yillik mintaqaviy seminarga mezbonlik qiladi. Seminardan koʻzlangan maqsad mintaqada korrupsiyaga qarshi kurash choralari va huquqiy tizimlarni mustahkamlash yoʻllarini oʻrganishdan iborat.

Institutning Jinoiy sudlovda korrupsiyaga qarshi kurash boʻyicha xalqaro oʻquv kursi mavjud boʻlib, unda davlat amaldorlari tomonidan poraxoʻrlik, oʻgʻirlik va oʻz vakolatlarini suiisteʼmol qilish kabi mamlakatlardagi korrupsiya muammolari haqida maʼlumot beriladi. Trening korrupsiyaning hozirgi holati, jinoyat-huquq tizimidagi korrupsiya bilan bogʻliq dolzarb muammolar va ularni hal qilish yoʻllari, tergov va ayblov darajasidagi muammo va yechimlar, korrupsiyaning oldini olish boʻyicha umumiy chora-tadbirlar va bu borada xalqaro hamkorlik kabi muhim masalalarni qamrab oladi.

Uchrashuvda shu kabi taʼlim jarayonlari, sohada oʻquv dasturlarini yaratish va tadqiqotlar olib borishga oid  qoʻshma tadbirlarni amalga oshirish  masalalari koʻrib chiqildi.  Shuningdek, Agentlik xodimlarini Jinoiy sudlovda korrupsiyaga qarshi kurash boʻyicha xalqaro oʻquv kursida uzluksiz tayyorlash amaliyotini yoʻlga qoʻyish muhokama qilindi.

Korrupsiyaga qarshi kurashish agentligi

Axborot xizmati