Ijtimoiy tarmoqlarda Surxondaryo viloyati hokimi tomonidan Bandixon tuman hokimligiga “Skoda Kodiaq Ambition” xizmat mashinasini xarid qilish uchun 429 mln. so‘m o‘tkazish to‘g‘risida farmoyish imzolangani haqida xabar (http://davletov.uz/) e’lon qilingan.

Mazkur holat Korrupsiyaga qarshi kurashish agentligi tomonidan o‘rganildi.

Aniqlanishicha, haqiqatdan ham Surxondaryo viloyati hokimligining 2022-yil 18-oktabrdagi 23-8-0-F/22-sonli farmoyishi bilan viloyat budjetining zaxira jamg‘armasi mablag‘lari hisobidan Bandixon tumani hokimligiga bir dona “Skoda Kodiaq Ambition” rusumli xizmat avtotransport vositasi xarid qilish va rasmiylashtirish bilan bog‘liq bo‘lgan xarajatlar uchun 429 000 000 (to‘rt yuz yigirma to‘qqiz million) so‘m mablag‘ ajratish nazarda tutilgan.

O‘zbekiston Respublikasi Vazirlar Mahkamasining 2021-yil 29-apreldagi “Davlat boshqaruvi va mahalliy davlat hokimiyati organlarida xizmat avtotransport vositalaridan foydalanish tizimini tubdan takomillashtirish chora-tadbirlari to‘g‘risida”gi 258-son qaroriga muvofiq Davlat boshqaruvi va mahalliy davlat hokimiyati organlarida xizmat avtotransport vositalarini biriktirish me’yorlari tasdiqlangan. 

Mazkur me’yorlarga ko‘ra tuman va shahar hokimliklarining rahbarlariga sotib olishga ruxsat etilgan xizmat avtotransportining eng yuqori narxi bazaviy hisoblash miqdoriga nisbatan 1000 barobari (300 mln so‘m), rahbar o‘rinbosarlariga esa bazaviy hisoblash miqdoriga nisbatan 700 barobari (210 mln so‘m) etib belgilangan.

Bundan ko‘rinadiki, Bandixon tumani hokimligiga sotib olinishi rejalashtirilgan xizmat avtotransportining narxi yuqorida qayd etilgan me’yorlarga zid bo‘lib, mazkur xaridning amalga oshirilishi O‘zbekiston Respublikasi “Davlat xaridlari to‘g‘risida”gi Qonuni hamda O‘zbekiston Respublikasi Vazirlar Mahkamasining 2021-yil 29-apreldagi 258-son qarori talablariga rioya qilinmasligini keltirib chiqaradi. 

Shu munosabat bilan, Agentlik tomonidan Surxondaryo viloyati hokimligiga viloyat hokimining 2022-yil 18-oktabrdagi 23-8-0-F/22-son farmoyishini bekor qilish yuzasidan taqdimnoma kiritildi.

Surxondaryo viloyati hokimining 2022-yil 21-oktabrdagi 231-8-0-F/22-son farmoyishi bilan viloyat hokimining “Bandixon tumani mahalliy budjetiga tuman hokimligiga bir dona “Skoda Kodiaq Ambition” rusumli xizmat avtotransport vositasi xarid qilish va rasmiylashtirish bilan bog‘liq bo‘lgan xarajatlar uchun 429 000 000 (to‘rt yuz yigirma to‘qqiz million) so‘m mablag‘ ajratish to‘g‘risida”gi 230-8-0-F/22-son farmoyishi bekor qilindi. 

Korrupsiyaga qarshi kurashish agentligi Axborot xizmati