Ona tabiatning saxovati cheksiz,  ne’matlari beminnat, biroq uning oʻzi ham e’tiborga, asrab-avaylashga hamisha muhtoj. 

Shu bois davlatimiz rahbarining 2021-yil 30-dekabrdagi “Respublikada koʻkalamzorlashtirish ishlarini jadallashtirish, daraxtlar muhofazasini yanada samarali tashkil etish chora-tadbirlari toʻgʻrisida”gi PF–46-son Farmoni, xususan, "Yashil makon" umummilliy loyihasini amalga oshirish borasidagi dolzarb vazifalar ijrosini ta’minlash  mamlakatimiz boʻylab ulkan tashabbus, xayrli harakatga aylanib ulgurdi.

20-oktabr kuni start olgan daraxt ekish boʻyicha navbatdagi "Dolzarb 40 kunlik" umumxalq tadbiri esa bu boradagi jonbozlik va faollikni yanada  jonlantirib yubordi.   

Korrupsiyaga qarshi kurashish agentligi jamoasi ushbu obodlik tadbirlariga bu gal ham  munosib hissa qoʻshishga kirishdi. Jumladan, kuni kecha Agentlik rahbariyati ishtirokida Agentlik hududida yaratilgan koʻrkam va moʻjazgina bogʻ hamda Agentlik binosi atrofi manzarali daraxt koʻchatlari bilan boyitilib, yanada  obodonlashtirildi.

Agentlik jamoasi koʻkalamzorlashtirish, daraxt va butalarni muhofaza qilish,  yashil maydonlarni kengaytirish kabi xayrli ishlarda oʻz ishtirokini faol davom ettirishni maqsad qilgan.  Zero, Ona tabiat barchamizniki, tiriklikni yashillik bilan asrashga esa  har birimiz mas’ulmiz. 

Korrupsiyaga qarshi kurashish agentligi 
Axborot xizmati