Korrupsiyaga qarshi kurashish agentligi byudjet buyurtmachilari tomonidan amalga oshirilayotgan davlat xaridlarida qonunchilik talablariga rioya qilinishi holatlarini muntazam o‘rganib bormoqda.

O‘rganishlarda ayrim davlat byurtmachilari tomonidan davlat xaridlarini amalga oshirishda bir qator qonunbuzilishi holatlariga yo‘l qo‘yilayotganligi aniqlanib, ularni barataraf etish yuzasidan choralar ko‘rilmoqda.

Jumladan, joriy yilning 10 oyida Agentlik tomonidan buyurtmachilarga aniqlangan jami 356,8 mlrd. so‘mlik qonunbuzilishlarni bartaraf qilish hamda kelgusida shu kabi holatlariga yo‘l qo‘ymaslik haqida 121 ta taqdimnomalar kiritilgan.

Mazkur 121 ta taqdimnomalardan 77 tasi masofaviy monitoringlar natijalari yuzasidan, 29 tasi jismoniy va yuridik shaxslarning murojaatlarini o‘rganish natijalari yuzasidan, 8 tasi ommaviy axborot vositalarida eʼlon qilingan materillarni o‘rganish natijalari yuzasidan, 7 tasi hududlarda o‘tkazilgan o‘rganishlar natijalari yuzasidan kiritilgan.

Jami ko‘rib chiqilgan 116 ta taqdimnomalardan 110 tasi qanoatlantirilib, 314,7 mlrd so‘mlik xarid natijalari yuzasidan tuzilgan shartnomalar bekor qilingan.

Shu bilan birga, o‘rganishlarda aniqlangan 122 ta qonunbuzilishi holatlari yuzasidan to‘plangan hujjatlar huquqni muhofaza qiluvchi organlarga yuborilgan.

Ushbu so‘rovnomalarning 72 tasi ko‘rib chiqilgan bo‘lib, ular asosida 22 ta jinoyat ishlari qo‘zg‘atilgan, 41 nafar shaxslarning maʼmuriy, 9 nafar shaxslarning intizomiy javobgarlikka tortilishi taʼminlangan.

Jumladan, Qoraqalpog‘iston Respublikasi Xalq taʼlimi vazirligi buyurtmachiligida 2022-yil 4-oktyabr kuni 22 ta lot bo‘yicha jami qiymati 11,6 mlrd. so‘mlik “umumiy o‘rta taʼlim maktablarining boshlang‘ich sinf o‘quvchilarini oziq-ovqat bilan taʼminlash xizmati” yuzasidan eʼlon bo‘yicha davlat xaridiga oid hujjat va maʼlumotlar o‘rganilganida mazkur davlat xaridida o‘zaro affillangan shaxslarga (“Crafers” va “Dolci Organic” MCHJlar) tegishli tadbirkorlik subyektlari ishtirok etib, g‘oliblikni qo‘lga kiritganligi aniqlandi.

Biroq, xarid komissiyasi tomonidan o‘zaro affillangan shaxslar xarid qilish tartib-taomillarida ishtirok etishdan chetlatilmasdan O‘zbekiston Respublikasi “Davlat xaridlari to‘g‘risida”gi Qonunning 42-moddasi va “Raqobat to‘g‘risida”gi Qonunining 14-moddasi talablari buzilganligi aniqlanib, buyurtmachi va yuqori tashkilotga xarid natijasini bekor qilish va kelgusida shu kabi qonunbuzilish holatlariga yo‘l qo‘ymaslik yuzasidan tegishli chora-tadbirlarni belgilash haqida taqdimnomalar kiritildi.

O‘zbekiston Respublikasi Xalq taʼlimi vazirligining javob xatiga ko‘ra buyurtmachi tomonidan ushbu tanlov natijalari bekor qilinib, tegishli chora-tadbirlar belgilab olingan.

Shuningdek, Xatirchi tumanida yashovchi fuqaro R.Yusupovning murojaatini o‘rganish natijasida Navoiy viloyati Xalq taʼlimi boshqarmasi tomonidan xarid qilingan kompyuter jamlanmalari 585 mln. 290 ming so‘m qimmat narxga xarid qilinganligi aniqlanib, to‘plangan hujjatlar huquqiy baho berish uchun 2022-yil 18-avgust kuni O‘zbekiston Respublikasi Bosh prokuraturasiga yuborilgan.

Mazkur holat yuzasidan, O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti Navoiy viloyati boshqarmasi tomonidan tergovga qadar tekshiruv harakatlari olib borilib, natijasiga ko‘ra 2022-yil 30-avgust kuni Navoiy viloyati Xalq taʼlimi boshqarmasi, “Computer Components” MCHJ hamda “Magnit Trade Group Business” MCHJ mansabdor shaxslariga nisbatan O‘zbekiston Respublikasi Jinoyat kodeksining 167-moddasi 3-qismi “a” bandi va 209-moddasi 1-qismi bilan jinoyat ishi qo‘zg‘atilgan bo‘lib, hozirda dastlabki tergov harakatlari olib borilmoqda.

Korrupsiyaga qarshi kurashish agentligi

Axborot xizmati