9-dekabr – Xalqaro korrupsiyaga qarshi kurash kuniga bag‘ishlangan "Aksilkorrupsiya haftaligi" doirasida o‘tkaziladigan tadbirlar rejasiga asosan, joriy yilning 25-noyabr kuni “Korrupsiyaga qarshi faoliyat samaradorligini oshirishda amaliy tadqiqotlarning ahamiyati” mavzusidagi xalqaro davra suhbati o‘tkazildi.

Tadbir Bosh prokuratura Akademiyasi, Korrupsiyaga qarshi kurashish agentligi, Nodavlat notijorat tashkilotlari milliy assotsiatsiyasi, “Yuksalish” umummilliy harakati, “Taraqqiyot strategiyasi” markazi, BMTning Giyohvandlik va jinoyatchilik bo‘yicha boshqarmasi hamkorligida tashkil etildi.

Davra suhbati aralash formatda tashkil etilib, Iqtisodiy hamkorlik va taraqqiyot tashkiloti, Ekspertlar forumi NNT (Ruminiya), Lund universiteti (Shvetsiya) ekspertlari, hududlarda faoliyat yuritayotgan nodavlat notijorat tashkilotlari (NNT), ilmiy va taʼlim muassasalari qatnashdi.

Tadbirda korrupsiyaga qarshi kurashish jarayonlarida fuqarolik va akademik hamjamiyatlarning o‘zaro hamkorligi masalalari, ularni ushbu jarayonga jalb etish uchun ko‘rilayotgan choralar va istiqboldagi vazifalar yuzasidan muloqot qilindi.

Faol muhokamalar jarayonida akademik doira va fuqarolik jamiyati institutlari vakillarining imkoniyatlaridan to‘liq foydalanishga to‘siq bo‘layotgan masalalar va ularni bartaraf etish yo‘llari yuzasidan fikr almashildi.

Akademik hamjamiyat o‘rtasida korrupsiyaga qarshi kurashish yo‘nalishi ko‘p tarmoqli bo‘lgani bois, tadqiqotlarni o‘zaro integratsiyasini yo‘lga qo‘yish, sotsiologik tadqiqotlarni hududlar va sohalar miqyosida ham tashkil etishda NNTlarni jalb etish yuzasidan takliflar ilgari surildi.

Shuningdek, NNTlarning ushbu yo‘nalishda faoliyat olib borayotgan ekspertlar bilan hamkorligini kuchaytirish, tadqiqotchi mutaxassislar tayyorlash tizimini kelgusida rivojlantirish bo‘yicha mulohazalar bildirildi.

Davra suhbatida yakunida korrupsiyaga qarshi kurashishda davlat organlari, akademik doira va fuqarolik jamiyati institutlarining hamkorligi samaradorlikka xizmat qilishi eʼtirof etildi hamda hamkorlikning istiqboldagi yo‘nalishlari belgilab olindi.

Korrupsiyaga qarshi kurashish agentligi

Axborot xizmati