9-dekabr – Xalqaro korrupsiyaga qarshi kurashish kuni munosabati bilan O‘zsanoatqurilishbank Bosh ofisida “Ochiq eshiklar kuni” bo‘lib o‘tdi. 

Korrupsiyaga qarshi kurashish agentligi bilan hamkorlikda tashkil etilgan tadbirda Bank tomonidan joriy qilingan Korrupsiyaga qarshi menejment tizimi talablari doirasida olib borilgan ishlar bo‘yicha maʼlumot berildi.

Qayd etilganidek, Korrupsiyaga qarshi menejment tizimining joriy etilgani bank faoliyatida xatarlar xavfini kamaytiradi, manfaatdor tomonlar (aksiyadorlar, hamkorlar, mijozlar, investorlar, qolaversa, jamoatchilik) oldida oshkoralik va ishonchlilikni taʼminlaydi, tashkilot va manfaatdor tomonlarni korrupsiyaning salbiy oqibatlaridan himoyalaydi, muassasaning ushbu yo‘nalishda amaldagi qonunlarga muvofiq ishlayotganini namoyon etadi.  

Shu bois joriy yilda ushbu tizimi qayta ko‘rib chiqilib, ISO 37001 xalqaro standarti hamda qonunchilik talablariga muvofiqlashtirildi, 20 ta ichki meʼyoriy hujjat ishlab chiqildi, korrupsiyaviy xavf-xatarlar xaritasi tuzilib, tizim bo‘yicha ichki audit o‘tkazildi.

Tadbirda Korrupsiyaga qarshi kurashish agentligi masʼullari tomonidan hamkorlikdagi ishlarga bag‘ishlangan taqdimot namoyish etilib, unda O‘zsanoatqurilishbank tizimida korrupsiyaga qarshi kurashish siyosati, odob-axloq kodeksi, manfaatlar to‘qnashuvini boshqarish to‘g‘risida nizom, aloqa kanallari orqali korrupsiyaviy xatti-harakatlar to‘g‘risida reglament, korrupsiyaviy xavf-xatarlarni baholash uslubiyoti kabi ichki meʼyoriy hujjatlar puxta ishlab chiqilganligi alohida taʼkidlandi.

Tadbirda ishtirokchilar Bank tizimida korrupsiyaga oid murojaatlar bilan ishlash, xizmat tekshiruvlarini o‘tkazish, arizalar reyestrini yuritish mexanizmlari bilan tanishtirildi.

Korrupsiyaga qarshi kurashish agentligi

Axborot xizmati