Konferensiyaning ikkinchi kuni Agentlik direktori A.Burxanov tadbirda ishtirok etayotgan davlat rahbarlari, vazirlar hamda sohada faoliyat yurituvchi idoralar va xalqaro tashkilotlar rahbarlarining tor doiradagi yig‘ilishida ishtirok etdi.

Unda Moldaviya prezidenti, BMT, Yevropa Ittifoqi, Jahon banki, Transparency international, USAID, FATF, OGP kabi tashkilotlarning rahbarlari, AQSH, Fransiya, Buyuk Britaniya, Daniya, Norvegiya davlatlarining korrupsiyaga qarshi kurashish idoralari rahbarlari qatnashdi.

Yig‘ilishda O‘zbekiston delegatsiyasi rahbari ma’ruza bilan ishtirok etib, korrupsiyaga qarshi kurashishda dolzarb bo‘lgan masalalarga to‘xtalib o‘tdi.

Xususan, O‘zbekiston tomoni tashabbusiga asosan davlat organlari tomonidan yakka tartibda xamda sohaning boshqa ishtirokchilari bilan hamkorlikda amalga oshirilishi zarur bo‘lgan choralar va bu boradagi duch kelinayotgan qiyinchiliklar bo‘yicha fikr almashildi.

Uchrashuv davomida, shuningdek, korrupsiyaga karshi kurashish siyosatini ishlab chiqishda nodavlat sektor vakillarining o‘rni, jurnalistik surishtiruvlarni qo‘llab-quvvatlash, xalqaro texnik ko‘mak masalalari ham muhokama qilindi.

Korrupsiyaga qarshi kurashish agentligi

Axborot xizmati