Korrupsiyaga qarshi kurashish agentligi tomonidan Toshkent shahar madaniyat bosh boshqarmasi buyurtmachiligida “etender.uzex.uz” maxsus axborot portaliga 8 ta lot bo‘yicha jami qiymati 5,8 mlrd. so‘mlik “Opera fest-2022”, “Music fest-2022”, “Food fest-2022”, “Art fest-2022”, “Dance fest-2022” festivallari va “Gullar bazmi”, “Nukus 5 tashabbus-2022” tadbirlarini tashkil etish yuzasidan davlat xaridlarini amalga oshirishda qonunchilik talablariga rioya qilinishi holati o‘rganildi.

O‘rganishlarga ko‘ra, ushbu tadbirlar joriy yil may-sentyabr oylarida o‘tkazilgan bo‘lishiga qaramay, portalga 6 ta lot bo‘yicha 24-oktyabr kuni va 2 ta lot bo‘yicha 3-noyabr kuni eʼlonlar joylashtirilgan.

Mazkur xaridlar yuzasidan 2 ta tadbirkorlik subyekti o‘zining tijorat takliflari bilan ishtirok etgan (“M.C.”  va “P.E.” MCHJlar) va ular bilan jami 5,7 mlrd. so‘mlik shartnoma imzolangan.

Shundan 4 ta lot bo‘yicha “M.C.” MCHJ bilan 2,8 mlrd.so‘mlik hamda 4 ta lot bo‘yicha “P.E.” MCHJ bilan 2,9 mlrd.so‘mlik shartnomalar imzolangan.

Yuqoridagi davlat xaridlarini amalga oshirishda O‘zbekiston Respublikasi “Davlat xaridlari to‘g‘risida”gi Qonun va O‘zbekiston Respublikasi Vazirlar Mahkamasining “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risida”gi 276-son Qarori bilan tasdiqlangan Nizom talablari buzilganligi aniqlandi.

O‘rganish jarayonida to‘plangan hujjatlar huquqiy baho berish uchun joriy yil 9-dekabr kuni Bosh prokuraturaga yuborildi.

Korrupsiyaga qarshi kurashish agentligi 
Axborot xizmati