OAV va ijtimoiy tarmoqlarda Mahallabay ishlash va tadbirkorlikni rivojlantirish agentligi tomonidan “Onlayn mahalla” elektron platformasi uchun tender o‘tkazmasdan 8,4 mlrd. so‘m pul mablag‘lari sarflanganligi holati tanqid qilingan materiallar o‘rganib chiqildi.

Aniqlanishicha, O‘zbekiston Respublikasi Prezidentining 2021-yil 24-dekabrdagi PQ-62-son qaroriga ko‘ra hokim yordamchilari faoliyatini samarali tashkil etish va baholab borish imkonini beruvchi hamda tegishli vazirlik va idoralar ma’lumotlar bazalari bilan integratsiya qilingan “Onlayn mahalla” elektron platformasi ishga tushirilishini ta’minlash vazifasi belgilangan.

Shunga ko‘ra, O‘zbekiston Respublikasi Vazirlar Mahkamasining Farmoyishiga muvofiq, Mahallabay ishlash va tadbirkorlikni rivojlantirish agentligi va “REALSOFT” MCHJ bilan 2022-yil 18-may kuni jami 8,4 mlrd so‘mlik qiymatdagi “Onlayn mahalla” platformasini yaratish va texnik xizmat ko‘rsatish bo‘yicha to‘g‘ridan-to‘g‘ri shartnoma rasmiylashtirilgan.

Agentlik tomonidan shartnoma qiymati bozor tamoyillariga mos tarzda shakllantirilganligini o‘rganish maqsadida, mazkur sohada faoliyat yurituvchi 3 ta korxonaga so‘rov yuborildi.

Ushbu korxonalar tomonidan “Onlayn mahalla” platformasi 4,2 -5,1 mlrd. so‘mga yaratib berilishi, shu jumladan bir yil davomida texnik xizmat ko‘rsatib borilishi haqida tijorat takliflari taqdim qilindi.

Bundan tashqari, O‘zbekiston Respublikasining “Davlat xaridlari to‘g‘risida”gi Qonunning 71-moddasida to‘g‘ridan-to‘g‘ri shartnomalar bo‘yicha davlat xaridlari O‘zbekiston Respublikasi Prezidentining farmonlari va qarorlari, O‘zbekiston Respublikasi Vazirlar Mahkamasining qarorlari asosida amalga oshirilishi ko‘rsatilgan.

Shunga ko‘ra, “Onlayn mahalla” platformasini yaratish bo‘yicha o‘tkazilgan davlat xaridini amalga oshirish jarayonida qonunchilik talablariga to‘liq rioya qilinganligiga, shuningdek, tovarlarni, ishlar va xizmatlar narxlari bozor tamoyillari asosida shakllantirilganligiga qonuniy baho berish uchun to‘plangan hujjatlar Bosh prokuraturaga yuborildi.