Joriy yilning 20-yanvar kuni Korrupsiyaga qarshi kurashish agentligi hamda Konrad Adenauer jamg‘armasining Markaziy Osiyodagi vakolatxonasi o‘rtasida hamkorlikni rivojlantirish yuzasidan uchrashuv bo‘lib o‘tdi.

Uchrashuvda Agentlik direktori Akmal Burxanov, vakolatxona rahbari Ronni Xayne va har ikki tashkilot masʼul xodimlari ishtirok etdi.

Konrad Adenauer tashkilotining korrupsiyaga qarshi kurashish sohasidagi islohotlarni amalga oshirishda yaqindan ko‘mak ko‘rsatganligini, jumladan, korrupsiyaga qarshi kurashish bo‘yicha ichki nazorat tuzilmalari faoliyatini takomillashtirish borasidagi hamkorligi eʼtirof etildi.

O‘z o‘rnida, R.Xayne Agentlik tomonidan olib borilayotgan ishlarni yuqori baholab, korrupsiyaga qarshi kurashish sohasidagi o‘zgarishlar tizimli ravishda yo‘lga qo‘yilganligini taʼkidlab o‘tdi va Agentlik bilan hamkorlik qilishdan mamnun ekkanligini bildirdi.

Shuningdek, uchrashuv doirasida ikki idora o‘rtasida kelgusidagi hamkorlik yo‘nalishlari muhokama qilindi. Jumladan, korrupsiyaga qarshi kurashish sohasida xalqaro ekspertlarni jalb qilgan holda seminar va treninglar tashkil etish, sohaga oid tadqiqotlarni tashkil etish belgilab olindi.

Uchrashuv so‘nggida tomonlar hamkorlikni yana-da jadallashtirishga, kelgusida qo‘shma tadbir va loyihalarni amalga oshirishga kelishib olishdi.


 

Korrupsiyaga qarshi kurashish agentligi

Axborot xizmati