Joriy yilning 25-yanvar kuni Korrupsiyaga qarshi kurashish agentligi, Sog‘liqni saqlash vazirligi, Davlat xizmatini rivojlantirish agentligi rahbariyati hamda fuqarolik jamiyati institutlari, ommaviy axborot vositalari ishtirokida “Sog‘liqni saqlash vazirligi tizimida “Korrupsiyasiz soha” loyihasining ijro etilishi: mavjud muammo va rejalar” mavzusida muloqot tashkil etildi.

Ushbu uchrashuv orqali sog‘liqni saqlash tizimida “Korrupsiyasiz soha” loyihasining ijro etilishi yuzasidan amalga oshirilayotgan chora-tadbirlarni tahlil qilish, korrupsiyaga sabab bo‘layotgan omillarni birgalikda muhokama qilish, bartaraf etish bo‘yicha istiqboldagi vazifalarni belgilash hamda ushbu jarayonlarga fuqarolik jamiyati institutlarini faol jalb etish maqsad qilingan.

Tadbirda ta’kidlanganidek, O‘zbekiston Respublikasi Prezidenti Shavkat Mirziyoyevning 2022-yil 20-dekabr kuni Oliy Majlis va O‘zbekiston xalqiga murojaatida korrupsiyaga qarshi kurashish har bir vazirlik va idora rahbarining asosiy vazifalaridan biri bo‘lishi lozimligi qayd etildi.
 

Bu borada Korrupsiyaga qarshi kurashish agentligi korrupsiya ko‘p uchrayotgan va xodimlari aholi bilan ko‘p muloqotga kirishuvchi sohalarda mas’ul vazirlik hamda idoralar bilan hamkorlikda korrupsiyaviy omillarni bartaraf etmoqda.

Xususan, Sog‘liqni saqlash vazirligi bilan hamkorlikda sog‘liqni saqlash tizimida “Korrupsiyasiz soha” loyihasini amalga oshirish yuzasidan
2021-2022-yillarga mo‘ljallangan “Yo‘l xarita”lari tasdiqlanib, ijroga qaratilgan.

Loyiha doirasida o‘tgan davrda quyidagilar amalga  oshirildi:

- tizimdagi korrupsiyaga oid holatlar haqida tezkor xabar berish uchun “1203” qisqa raqamli “ishonch telefoni” va Call-markaz ishga tushirildi;

- davlat tibbiyot muassasalarida budjet mablag‘lari hisobidan imtiyozli toifaga kiruvchi shaxslarga kvota asosida order berishni to‘liq elektron shaklda amalga oshirish mexanizmi joriy etildi;

- 10 dan ortiq xizmat turlari to‘la elektron shaklga o‘tkazilib, davolash-profilaktika muassasalarining tasdiqlangan pullik xizmatlari miqdori vazirlikning rasmiy veb-saytiga joylashtirilishi ta’minlandi;

- sohada korrupsiyaning oldini olishga qaratilgan 26 mingdan ortiq targ‘ibot materiallari tayyorlanib, 3 mingdan ziyod tibbiyot muassasalari, oilaviy poliklinika va shifoxonalarning kirish joylariga joylashtirildi hamda “Sog‘liqni saqlash xodimlari uchun korrupsiyaga qarshi kurashishga oid eslatma” tayyorlanib, tizim xodimlariga tarqatildi.

Shu bilan birga, ushbu yo‘nalishda sohani yanada takomillashtirishda to‘siq bo‘layotgan bir qator muammolar saqlanib qolmoqda.

Xususan, 2022-yil davomida soha xodimlari tomonidan sodir etilgan jinoyatlarning asosiy qismi xodimlarning ish haqlarini o‘zlashtirish, ishga kiritish yoki ish soatini ko‘paytirish, davlat xaridlari, tibbiyot muassasalarga tegishli mol-mulklar va budjet  mablag‘larini o‘zlashtirish, tibbiy muolajalar uchun pora olish kabi  holatlar bilan bog‘liq.

Bular orasida, tibbiyot xodimlarini ishga qabul qilish, lavozimga tayinlash hamda ularga ish haqlarini hisoblash bilan bog‘liq korrupsion jinoyat sodir etgan shaxslar soni sog‘liqni saqlash tizimdagi jami jinoyat sodir etgan shaxslarning deyarli 50 foizini tashkil etmoqda.
 

Tahlillar shuni ko‘rsatmoqdaki, korrupsiyaviy jinoyatlarga qo‘l urayotgan shaxslarning aksariyati shifokor yoki boshqa tibbiyot xodimlari emas, balki rahbar va ma’muriy boshqaruv xodimlari xissasiga to‘g‘ri kelmoqda.

Shuningdek, Agentlik, vazirlik, Davlat xizmatini rivojlantirish agentligi hamkorlik yo‘nalishlari qatorida ma’muriy boshqaruv xodimlarning malakasini muntazam oshirib borish, tizimda ishga qabul qilishning ochiq va shaffof mexanizmlarini joriy etish masalasini muhokama qilishdi.

Muloqot davomida ommaviy axborot vositalari hamda nodavlat notijorat tashkilotlari xususan, Agentlik huzuridagi jamoatchilik kengashi vakillari sohada jamoatchilik nazoratini amalga oshirish yo‘nalishlari to‘g‘risida o‘z takliflarini bildirishdi.

Yig‘ilish yakunida sohada korrupsiyani bartaraf etish, jamoatchilik nazoratini kuchaytirish, ochiqlikni ta’minlashga oid vazifalar aks etgan Korrupsiyaga qarshi kurashish agentligi Sog‘liqni saqlash vazirligi va Davlat xizmatini rivojlantirish agentligining qo‘shma bayonoti qabul qilindi.

Bayonotda amalga oshirilayotgan ishlarni muntazam ravishda jamoatchilikka taqdim etib borish va muhokama qilish amaliyotini yo‘lga qo‘yish, ishga qabul qilishni ochiq tanlov asosida amalga oshirish, ishga qabul qilish yuzasidan kelib tushgan murojaatlarni ko‘rib chiqish bo‘yicha elektron platformani ishga tushirish kabi yo‘nalishlarda muhim vazifalar belgilandi. Shuningdek, vazirlikning rasmiy veb-saytida tizimdagi bo‘sh ish o‘rinlari haqida ma’lumotlarni aks ettirib borish, tibbiyot xodimlariga mehnatga haq to‘lashning toifalangan zamonaviy mexanizmlarini joriy etish, tibbiyot muassasalari band qilingan va bo‘sh turgan o‘rin (joy) haqida onlayn ma’lumot beruvchi elektron platformani ishga tushirish, sohani raqamlashtirish masalalari o‘rin oldi.

Qo‘shma bayonot ommaviy axborot vositalari hamda keng jamoatchilikka e’lon qilindi.
 

Korrupsiyaga qarshi kurashish agentligi

Axborot xizmati