Joriy yilning 11 mart kuni Korrupsiyaga qarshi kurashish agentligi direktori Akmal Burxanov Yaponiyaning Doshisha universiteti professori, BMT hamda Jahon bankining korrupsiyaga qarshi kurashish bo‘yicha eksperti, G-20 aksilkorrupsiya akademik guruhi aʼzosi Eyji Oyamadani qabul qildi.

Uchrashuvda Agentlik, JICA va Doshisha universiteti o‘rtasida hamkorlik ko‘lamini kengaytirish, xususan korrupsiyaning oldini olishga qaratilgan yangi loyihalarni ishlab chiqish, JICA tomonidan tashkil etiladigan dasturlarga Agentlik vakillarini jalb qilish, o‘quv seminarlarini o‘tkazishda ekspertlik yordamini ko‘rsatish singari hamkorlik masalalari muhokama qilindi.

O‘z nuqtida Eyji Oyamada O‘zbekistondagi aksilkorrupsiya islohotlarini amalga oshirishda yaqindan ko‘mak ko‘rsatishga tayyorligini taʼkidladi.

Muzokaralar mobaynida Yaponiya hukumatining Inson resurslarini rivojlantirish stipendiyasi loyihasi (JDS) dasturida Agentlik ishtirokini taʼminlash borasida fikr almashildi.

Uchrashuv so‘nggida tomonlar korrupsiyaning oldini olishda yaqin hamkorlikni olib borish, birgalikda qo‘shma loyihalar va o‘quv dasturlarini ishlab chiqish, JICA dasturlari uchun loyihalarni shakllantirish yuzasidan kelishuvga erishdilar.

Korrupsiyaga qarshi kurashish agentligi

Axborot xizmati