Joriy yilning 18 aprel kuni Korrupsiyaga qarshi kurashish agentligi va Birlashgan millatlar tashkiloti Tarraqiyot Dasturining (BMT TD) Istanbul mintaqaviy markazi missiyasi vakillari bilan uchrashuv bo‘lib o‘tdi.

Uchrashuvni o‘tkazishdan asosiy maqsad O‘zbekistonda ma’muriy va davlat xizmatidagi islohotlar bilan tanishish, ularni qo‘llab-quvvatlash va samaradorligini oshirish bo‘yicha takliflar ishlab chiqish hamda yaqin hamkorlik olib borish masalalarini muhokama qilish bo‘ldi.

Uchrashuvda ishtirokchilarga korrupsiyaga qarshi kurashishda O‘zbekistonning xalqaro reyting va indekslardagi o‘rni, korrupsiyaning oldini olishga qaratilgan islohotlarda informatsion texnologiyalardan foydalanishning o‘rni, korrupsiya to‘g‘risida xabar beruvchilarni himoya qilish tizimining samaradorligi, davlat xizmatchilarining mol-mulki va daromadlarini deklaratsiya qilish tizimini joriy etish kabi yo‘nalishlarda olib borilayotgan ishlar yuzasidan ma’lumot berildi.

Shu bilan bir qatorda, yurtimizda amalga oshirilayotgan keng-qamrovli ma’muriy islohotlarda Agentlikning roli, sohada nodavlat notijorat tashkilotlari va OAV bilan o‘zaro hamkorligi yuzasidan fikr almashilib, sohada BMT TD bilan hamkorlik istiqbollari o‘rganildi.

Uchrashuv yakunida tomonlar korrupsiyaga qarshi kurashishda qo‘shma loyihalarni amalga oshirish, texnik va konsultativ ko‘makni davom ettirishga kelishib olishdi.