Korrupsiyaga qarshi kurashish milliy kengashining tegishli qaroriga asosan, Qoraqalpog‘iston Respublikasi, viloyatlar va Toshkent shahar korrupsiyaga qarshi kurashish hududiy kengashlari faolligini oshirish, joylarda korrupsiyaning oldini olish bo‘yicha belgilangan vazifalarning ijrosini ta’minlash maqsadida joriy yilning aprel-sentyabr oylari davomida seminar mashg‘ulotlari tashkil etish belgilangan. 

Seminarlar mavzusi turli yo‘nalishlarda bo‘lib, hududiy kengashlarning takliflari asosida shakllantirildi.

Bugun mazkur seminarlarning dastlabkisi “Davlat organlari va tashkilotlari, shu jumladan, mahalliy ijro etuvchi hokimiyat organlarida korrupsiyaga qarshi kurashish bo‘yicha chora-tadbirlarning samaradorligi reyting baholash natijalari” mavzusida tashkil etildi.

Ta’kidlanganidek, joriy yilda Davlat organlari va tashkilotlari, shu jumladan, mahalliy ijro etuvchi hokimiyat organlarida korrupsiyaga qarshi kurashish bo‘yicha chora-tadbirlarning samaradorligi reyting baholash ishlari ilk marta respublika miqyosida tashkil etildi.

Ma’lumot uchun: O‘zbekiston Respublikasi Prezidentining 2022-yil 12-yanvardagi PQ-81-son qaroriga ko‘ra, baholash 29 ta maxsus indikatorlar asosida “E-Anticor.uz” elektron platformasi orqali amalga oshiriladi.

Mazkur reytingda davlat tashkilotlarida korrupsiyaga qarshi kurashish bo‘yicha mexanizm va huquqiy asoslarning amaliyotga tatbiq etilganligi, korrupsiyaviy xavf-xatarlarni kamaytirilganligi, davlat tashkilotlari rahbarlarining korrupsiyaga qarshi murosasiz munosabati, xodimlarning korrupsiyaga qarshi kurashishga oid ichki tartiblardan xabardorligi, aholini ushbu illatga nisbatan murosasiz munosabatini shakllantirishga qaratilgan targ‘ibot tadbirlarining samaradorligi baholanadi.

Tadbir davomida baholash natijalariga ko‘ra hududlar ko‘rsatgan natijalarga e’tibor qaratildi.

Qayd etilganidek, hududlar miqyosida “Yaxshi” ko‘rsatkichini hech qaysi hudud egallamadi. Buxoro, Namangan, Toshkent shahri, Sirdaryo, Samarqand, Toshkent, Jizzax, Farg‘ona viloyatlari “Qoniqarli” natijani ko‘rsatdi. Xorazm, Navoiy, Qoraqalpog‘iston Respublikasi Vazirlar Kengashi, Qashqadaryo, Andijon, Surhondaryo viloyatlari esa “Qoniqarsiz” baho oldi.

Hududlarda korrupsiyaga oid islohotlarni birdek ta’minlanishiga mas’ul sifatida Korrupsiyaga qarshi kurashish hududiy kengashlariga mazkur natijalarni keltirib chiqargan sabablar haqida tushuntirishlar berildi.

Shuningdek, mazkur natijalarni tahlil qilish va hududiy kengashlar yig‘ilishlarida muntazam muhokama qilib borishi, reyting natijalarini yaxshilash bo‘yicha mas’ullarga tegishli taklif va topshiriqlarni berib borish lozimligi bildirildi.

Seminar yakunida hududiy kengash a’zolari o‘zlarini qiziqtirgan savollarga javoblar olishdi.