Korrupsiyaga qarshi kurashish agentligi tomonidan gumon qilinuvchi,ayblanuvchi va sudlanuvchilarga yuridik yordam ko‘rsatilganligi uchun davlat budjetidan ajratilgan mablag‘larning maqsadli sarflanishi yuzasidan o‘rganish o‘tkazildi va ushbu yo‘nalishdagi korrupsiyaviy xavf-xatarlar tahlil qilindi.

Davlat mablag‘lari hisobidan fuqarolarga yuridik yordam ko‘rsatish faoliyati Adliya vazirligi tomonidan 2008-yil 2-dekabrda 1878-son bilan ro‘yxatga olingan “Gumon qilinuvchi, ayblanuvchi yoki sudlanuvchiga advokatlar tomonidan yuridik yordam ko‘rsatish bo‘yicha xarajatlarni davlat hisobiga o‘tkazish tartibi to‘g‘risida”gi Nizom (keyingi o‘rinlarda - Maxsus nizom) bilan tartibga solinadi.

Maxsus nizom talablariga asosan davlat mablag‘lari hisobidan fuqarolarga yuridik yordam ko‘rsatish surishtiruvchi, tergovchi, prokurorning qarori, sudning ajrimi bilan tuman (shahar) moliya bo‘limlari tomonidan amalga oshiriladi.

Maʼlumotlarga ko‘ra, Toshkent shahri bo‘yicha 2019-2022 yillar davomida advokatlar tomonidan gumon qilinuvchi, ayblanuvchi va sudlanuvchilarga dastlabki tergov va sud tartibida ko‘rilgan jinoyat ishlari bo‘yicha ko‘rsatilgan yuridik yordam uchun budjet mablag‘lari hisobidan 240 ta advokatlik tuzilmalariga jami 42,9 mlrd so‘m pul mablag‘lari to‘lab berilgan.

Tahlillar birgina Toshkent shahri bo‘yicha davlat mablag‘lari hisobidan fuqarolarga yuridik yordam ko‘rsatish miqdori so‘nggi to‘rt yil davomida 7,9 mlrd so‘mga yoki 50,3 foizga ortganligini ko‘rsatdi (2019-yilda 8 mlrd so‘m, 2022-yilda 15,9 mlrd so‘m).

Shuningdek, o‘rganish natijasida ayrim advokatlik tuzilmalari tomonidan yuridik yordam ko‘rsatish sohasida davlat budjeti mablag‘larini o‘zlashtirish yo‘li bilan talon-toroj qilish holatlariga yo‘l qo‘yilganligi aniqlandi.

Xususan, “A” advokatlik byurosi advokati “T” 2021-yil va 2022-yilning 5 oyi davomida 2700 dan ortiq holatda gumon qilinuvchi, ayblanuvchi va sudlanuvchilarga yuridik yordam ko‘rsatish to‘g‘risidagi hujjatlarga soxta maʼlumotlar kiritgan holda moliya organlariga taqdim etgan va shu orqali davlat budjeti hisobidan 1,69 mlrd so‘m miqdordagi pullarni noqonuniy ravishda o‘zlashtirgan.

Mazkur holat bo‘yicha Toshkent shahar prokuraturasi tomonidan unga nisbatan jinoyat ishi qo‘zg‘atilgani holda JKning 168-moddasi 4-qismi va 228-moddalari bilan ayblov eʼlon qilingan.

Dastlabki tergov harakatlari davomida ayblanuvchidan yetkazilgan zararning to‘liq undirilishi taʼminlangan.

Tahlillar va o‘rganish yakunlari bo‘yicha Agentlik tomonidan davlat mablag‘lari hisobidan yuridik yordam ko‘rsatish sohasida mavjud korrupsiyaviy xavf-xatarlarni bartaraf etishga qaratilgan takliflar ishlab chiqilib, tegishli idoralarga taqdim etildi.

Korrupsiyaga qarshi kurashish agentligi

Axborot xizmati