O‘zbekiston Respublikasi Prezidentining 2019 yil 27 maydagi “O‘zbekiston Respublikasida korrupsiyaga qarshi kurashish tizimini yana-da takomillashtirish chora-tadbirlari to‘g‘risida”gi PF-5729-son Farmoni asosida oliy taʼlim tizimida (keyingi o‘rinlarda – Tizim deb yuritiladi) “korrupsiyasiz soha” loyihasi amalga oshirilmoqda. Bu yo‘nalishda olib borilayotgan ishlar O‘zbekiston Respublikasi Korrupsiyaga qarshi kurashish milliy kengashida muhokama qilinib, tegishli chora-tadbirlar belgilanmoqda.

Shuningdek, Agentlik tashabbusi bilan Oliy taʼlim, fan va innovatsiyalar vazirligi tizimida komplayens nazoratni o‘rnatish, kadrlarni tanlash, ularning malakasini oshirish, attestatsiyadan o‘tkazish, odob-axloq qoidalariga rioya qilish, korrupsiyaviy huquqbuzarliklar haqida xabar berish, manfaatlar to‘qnashuvini boshqarish, davlat xaridlarini amalga oshirishning ochiq va shaffof mexanizmlarini o‘zida ifodalagan korrupsiyaga qarshi kurashish siyosati, huquqni muhofaza qilish organlari bilan hamkorlik qilish, xizmat siri, maxfiylik qoidalari va boshqa yo‘nalishlar bo‘yicha 18 ta ichki idoraviy hujjatlar xalqaro standartlarga mos ravishda ishlab chiqildi va tizim faoliyatiga tatbiq etildi. Tizim faoliyatini tartibga soluvchi meʼyoriy hujjatlar o‘rganilib, sohada korrupsiya holati mavjud bo‘lishi ehtimoli bor bo‘lgan korrupsion xavf-xatarlar kuzatilayotgan yo‘nalishlar belgilab berildi.

Xususan, oliy taʼlim jarayonlarini boshqarishga mo‘ljallangan HEMIS axborot tizimini joriy etish orqali 2021/2022 o‘quv yilidan boshlab talabalarning shaxsiy varaqasi, guruh jurnali, reyting daftarchasi, dars jadvali, davomat va o‘zlashtirish qayd varaqalarini raqamlashtirish, ularni qog‘oz ko‘rinishida yuritilishini bekor qilish bo‘yicha tavsiyalar berildi. Vazirlikda yashirin iqtisodiyot va korrupsiyaga qarshi kurashish hamda uning oldini olish bo‘yicha “Yo‘l xaritasi” tasdiqlandi va ijrosi nazoratga olindi.

Bundan tashqari, vazirlik markaziy apparati, uning tuzilmalari, oliy taʼlim muassasalari, kasbiy taʼlimni rivojlantirish va muvofiqlashtirish hududiy boshqarmalarida “komplayens-nazorat” tizimi joriy etildi.

Jumladan, 108 ta davlat va 2 ta nodavlat (Belarus-O‘zbekiston qo‘shma tarmoqlararo amaliy texnik kvalifikatsiyalar instituti va Rossiya davlat neft va gaz universitetining Toshkent filiali) oliy taʼlim muassasalarida 182 ta shtat birligidan iborat Korrupsiyaga qarshi kurashish va “komplayens nazorat” tizimini boshqarish bo‘limlari (bo‘lim) tashkil etildi. Bo‘lim xodimlari uchun 14 soatlik masofaviy malaka oshirish kurslari tashkil qilindi va 50 nafar xodimga Huquqni muhofaza qilish akademiyasi (sobiq Bosh prokuratura akademiyasi) tomonidan kasbiy malaka oshirilganligi bo‘yicha sertifikat berildi.

Ushbu bo‘limlar zimmasiga korrupsiyaga nisbatan murosasiz munosabatni shakllantirish, talaba yoshlar va pedagog xodimlarning huquqiy ongi va huquqiy madaniyatini yuksaltirish, korrupsiyaviy holatlarni barvaqt aniqlash, oldini olish va bartaraf etish, manfaatlar to‘qnashuviga yo‘l qo‘ymaslik, davlat xaridlarini amalga oshirish va fuqarolarni ishga qabul qilish jarayonlarini shaffof va ochiqligini taʼminlash vazifalari yuklatildi. Mazkur bo‘limlar tomonidan talabalar va pedagog xodimlar orasida korrupsiyaviy xavf-xatarlarni aniqlash, taʼlim jarayonining shaffofligi va ochiqligini taʼminlashga qaratilgan anonim so‘rovlar o‘tkazildi.

Shu bilan birga, barcha toifa xodimlarning huquqiy ongi va madaniyatini oshirish maqsadida ularga korrupsiyaga qarshi kurashish ichki tizimi faoliyatini muvofiqlashtiruvchi meʼyoriy hujjatlar to‘plami tarqatildi. Talaba-yoshlar o‘rtasida mavzuga doir insho yozish, rasm chizish va videoroliklar tayyorlash bo‘yicha tanlovlar o‘tkazildi. Korrupsiyaning salbiy oqibatlarini aks ettiruvchi videorolik va targ‘ibot materiallari tayyorlanib, rasmiy veb-saytga joylashtirildi.

Shuningdek, barcha oliy taʼlim muassasalarida anonim so‘rovlar va boshqa murojaat kanallari orqali kelib tushayotgan maʼlumotlarni o‘rganish, tahlil qilish va tasdiqlangan maʼlumotlar asosida tegishli chora ko‘rish uchun taʼlim muassasasi rahbariyatiga axborot berish tizimi joriy etildi.

Talabalar va pedagog xodimlarning huquqiy madaniyatini oshirish hamda ular orasida korrupsiyaviy huquqbuzarliklarning oldini olish maqsadida rasmiy telegram bot tashkil etildi. “Ishonch telefoni” va antiсor@еdu.uz elektron pochta faoliyati yo‘lga qo‘yildi. Oliy taʼlim muassasalarining o‘quv binolarida “Adolat qutilari” o‘rnatildi.

Bundan tashqari, sohaga oid ayrim meʼyoriy-huquqiy hujjatlarga qo‘shimcha va o‘zgartishlar kiritildi. Natijada tizimli korrupsiyaning oldi olinib, korrupsiyaviy xavf-xatarlarning mavjudlik darajasi minimallashtirildi. Xorijdan o‘qishni davlat oliy taʼlim muassasalariga ko‘chirishni Davlat test markazi orqali amalga oshirish tartibi yo‘lga qo‘yildi. Magistratura bosqichlariga imtihonsiz qabul qilish tashkil etildi. Abituriyentlarga yo‘nalish bo‘yicha 5 ta oliy taʼlim muassasasini tanlash, qo‘shimcha kvotalar ajratish va qo‘shimcha to‘lov kontraktini to‘lash muddatlari uzaytirildi. Barcha xodimlarga manfaatlar to‘qnashuviga yo‘l qo‘ymasligi bo‘yicha deklaratsiya to‘ldirish tizimi joriy etildi. Ishga qabul qilishda shaffoflikni taʼminlash maqsadida milliy vakansiyalar bazasining http.ish.mehnat.uz va http://vacancy.edu.uz saytlariga bo‘sh ish o‘rinlari to‘g‘risida maʼlumotlar eʼlon qilish tartibi yo‘lga qo‘yildi.

Tizimda korrupsiya holatlarining oldini olishga qaratilgan shu kabi chora-tadbirlar kuchaytirilganligiga qaramasdan korrupsiyaviy omillar va xavf-xatarlar hamon saqlanib qolmoqda.

Xususan, professional taʼlim muassasalari direktorlarini lavozimga tayinlashda shaffoflik mexanizmi mavjud emas. Nomzodlarni Davlat xizmatlarini rivojlantirish agentligi orqali lavozimga tayinlash amaliyoti yo‘lga qo‘yilmagan. Ayrim oliy taʼlim muassasalarida xodimlar o‘rtasida qarindosh-urug‘chilik aloqalari bilan bog‘liq manfaatlar to‘qnashuvi bartaraf etilmagan. Byudjet va byudjetdan tashqari mablag‘lardan foydalanish, ish haqi, stipendiya va boshqa to‘lovlarning to‘lanishi hamda davlat xaridlarini amalga oshirishda qonunchilik talablari buzilmoqda.

Shuningdek, HEMIS platformasining himoya darajasi pastligi kurs   ishlari va yakuniy malakaviy ishlarni topshirish, ijodiy (kasbiy) imtihonlarni qabul qilish, turli nomdor stipendiyalarga va mukofotlarga nomzodlarni tanlash va tavsiya qilish, fuqarolarni ishga qabul qilish, xodimlarni yuqori lavozimlarga tayinlash, ularning oylik ish haqlariga ustamalar belgilash, oliy taʼlim muassasalari balansidagi binolarni ijaraga berish bilan bog‘liq jarayonlarni inson omili ishtirokida amalga oshirilishi korrupsiyaviy holatlarni yuzaga kelishiga sabab bo‘lmoqda.

Jumladan, korrupsiyaga qarshi kurashish bo‘linmalari tomonidan oliy taʼlim muassasalarida aniqlangan 53 ta korrupsiyaviy holat bo‘yicha 28 marotaba xizmat tekshiruvlari o‘tkazilib, to‘plangan hujjatlar qonuniy baho berish uchun huquqni muhofaza qiluvchi va nazorat organlariga yuborilgan.

O‘rganish natijalari bo‘yicha 80 nafar xodimga nojo‘ya xatti-harakatlar sodir etgani uchun tegishli choralar ko‘rildi. 56 ta holatda yaqin qarindoshlarning o‘zaro bo‘ysunuvida ishlashi bilan bog‘liq manfaatlar to‘qnashuvi aniqlandi. 31 nafar xodim boshqa lavozimga o‘tkazildi, 4 nafar xodim egallab turgan lavozimidan ozod etilgan, 22 nafar xodim intizomiy jazoga tortilgan. 2 nafar pedagog xodimga nisbatan huquqni muhofaza qilish organlari tomonidan O‘zbekiston Respublikasi Jinoyat kodeksining 167 va 168-moddalariga asosan jinoyat ishlari qo‘zg‘atilgan.

Bundan tashqari, anonim so‘rov natijalari bo‘yicha odob-axloq va ichki mehnat tartib qoidalarini buzgan 58 nafar pedagog xodimga (TDTU 21 nafar, JizPI 10 nafar, TTA Urganch filiali 9 nafar, Qarshi MII 9 nafar, BuxDU 6 nafar, ToshDIU Samarqand filiali 1 nafar, Andijon MI 1 nafar, SamDU 1 nafar), jumladan, 43 nafariga intizomiy jazo chorasi qo‘llanilgan,15 nafari bilan tuzilgan mehnat shartnomalari bekor qilingan.

Davlat xaridlarini amalga oshirishda korrupsiyaviy holatlarni aniqlash va kontragentlarning ishonchliligini tekshirish borasida o‘tkazilgan o‘rganishlarda 6 ta oliy taʼlim muassasasida qonunbuzilishi holatlari aniqlangan (Andijon mashinasozlik instituti, Toshkent davlat texnika universiteti, Toshkent to‘qimachilik va yengil sanoat instituti, Toshkent kimyo texnologiya instituti, Samarqand davlat chet tillar instituti hamda Navoiy davlat konchilik va texnologiyalar universiteti).

Bundan tashqari, Agentlik tomonidan Buxoro muhandislik-texnologiya institutida korrupsiyani keltirib chiqarayotgan omillar, unga sabab bo‘layotgan shart-sharoitlar, mablag‘lardan foydalanish va davlat xaridlarini amalga oshirishda qonunchilikka rioya etilishi ahvoli o‘rganildi.

O‘rganishda qurilish ishlariga va boshqa sohalarga mablag‘lar noqonuniy sarflanganligi, to‘lovlar to‘g‘ri hisoblanmaganligi oqibatida ish haqi, stipendiya va boshqa to‘lovlarni noto‘g‘ri to‘langanligi, shuningdek, davlat xaridlari va mehnat qonunchiligi talablariga rioya qilinmaganligi aniqlandi.

Institutda qarindosh-urug‘chilik aloqalari borasida  manfaatlar to‘qnashuviga yo‘l qo‘yilganligi, tyutorlik lavozimlariga yoshlar bilan ishlashda lozim darajada tajriba orttirmagan hamda yetarli pedagogik stajga ega bo‘lmagan xodimlar amaldagi talablarga zid ravishda ishga qabul qilinganligi, ayrim abituriyentlarning tabaqalashtirilgan to‘lov-kontraktlari miqdori buyruqlarda belgilanmaganligi, qo‘shma taʼlim dasturlari asosida taʼlim yo‘nalishlariga qabul qilingan baʼzi bir abituriyentlarning test sinovlarida ishtirok etishlari uchun tanlangan taʼlim yo‘anlishlari va o‘qishga qabul qilishda buyruq bilan belgilangan taʼlim yo‘anlishlari bir-biriga mos kelmasligi maʼlum bo‘ldi.

Shuningdek, elektron tizim orqali hujjat topshirmagan fuqarolar to‘g‘ridan-to‘g‘ri arizalari asosida stajyor-tadqiqotchilikka qabul qilingan, ularning arizalari qayd kitobidan ro‘yxatdan o‘tkazilmagan, qabul haqida ommaviy axborot vositalarida eʼlon berilmagan. Institutda texnik xodimlarni ishga olish tartibi belgilanmagan.

Institut rahbariyati xodimlarni ishga olishda tanish-bilishchilik va qarindosh-urug‘chilikka yo‘l qo‘yayotganligi, jumladan, o‘zining yaqin va uzoq qarindoshlarini ishga olib, ularga ustama belgilashda ijtimoiy adolat mezonlarini buzayotganligi bo‘yicha institut xodimlari tomonidan Agentlikka murojaatlar kelib tushgan.

O‘rganishda Institut rahbari turmush o‘rtog‘ini, opasi va qaynsinglisining qizini va bojasini ishga olganligi, shuningdek, ularning ish haqiga ikki barobar ustama belgilab kelganligi aniqlandi.

Vazirlik tasarrufidagi sobiq Taʼlim sifatini nazorat qilish inspeksiyasi tomonidan nodavlat oliy taʼlim muassasalariga litsenziya berilishida qonun talablariga rioya qilinishi ahvoli o‘rganilganida esa 38 ta nodavlat oliy taʼlim muassasalariga litsenziya berish bilan bog‘liq 82 ta holatda turli kamchilik va qonunbuzilish holatlariga yo‘l qo‘yilganligi, tizimda hanuzgacha manfaatlar to‘qnashuvi, mahalliychilik, nepotizm va urug‘-aymoqchilik kabi korrupsiyaviy xavf-xatarlar saqlanib qolayotganligini ko‘rsatdi.

Shuningdek, rotatsiya qilinishi lozim bo‘lgan aksariyat pedagog-xodimlarni, shu jumladan, kafedra mudirlarini mutaxassisliklari mo‘ljallangan teng lavozimlarning mutaxassisligiga mos kelmaslik holati, o‘z navbatida, mavjud manfaatlar to‘qnashuvini boshqarishga zid bo‘lgan holatlarni bartaraf etishda o‘z salbiy taʼsirini o‘tkazmoqda.

Korrupsiyaga qarshi kurashish borasida olib borilayotgan ishlarning samaradorligiga salbiy taʼsir o‘tkazayotgan muhim omillardan yana biri aksariyat oliy taʼlim muassasalarining (shu jumladan, moliyaviy va akademik mustaqil maqomiga ega bo‘lgan muassasalarda) ichki nazorat tuzilmalarida ishlayotgan xodimlarning oylik maoshlari sezilarli darajada pastligidir.

Misol uchun, hozirda korrupsiyaga qarshi kurashish tuzilmasi rahbarini oylik ish haqi 1,8-2,3 mln so‘mni, bosh mutaxassisning lavozim maoshi 1,2-1,6 mln so‘mni tashkil qiladi.

Tahlillar sohada korrupsiyaviy harakatlarni yuzaga kelishiga quyidagi omillar sabab bo‘layotganligini ko‘rsatdi:

- “HEMIS” platformasiga kiritilgan maʼlumotlarning manfaatdor shaxslar tomonidan o‘zgartirishga imkoniyatlar mavjudligi va ushbu tizimning  himoyalanishi talab darajasida emasligi;

- davlat xaridlarini amalga oshirish, xodimlarni ishga qabul qilish va  lavozimlarga tayinlashda inson omilining mavjudligi hamda ushbu yo‘nalishlar to‘liq raqamlashtirilmaganligi;

- bir shaxsni kafedra mudiri, fakultet dekani, prorektor va rektor   lavozimlarida uzoq yillar ishlab kelayotganligi hamda ularni rotatsiya yoki almashtirish amaliyoti joriy qilinmaganligi;

- Vazirlar Mahkamasining 2006 yil 10 fevralda tasdiqlangan “Oliy taʼlim muassasalariga pedagog xodimlarni tanlov asosida ishga qabul qilish tartibi to‘g‘risidagi nizomni tasdiqlash haqida”gi Iaroriga muvofiq kafedra mudiri pedagog xodim hisoblanishi, bu esa o‘z navbatida, manfaatlar to‘qnashuviga yo‘l qo‘yilishiga  sabab bo‘layotganligi;

- qurilish, taʼmirlash va xaridlarni amalga oshirishda tender o‘tkazish jarayonlariga taʼsir o‘tkazish orqali manfaatlar to‘qnashuviga yo‘l qo‘yish, hamkor tashkilotlar rahbarlari bilan oldindan til biriktirilgan holda ajratiladigan mablag‘larni noqonuniy o‘zlashtirish;

- tanlovlar shaffoflik va ochiqlikni taʼminlash mezonlariga javob bermasligi;

- qo‘shimcha to‘lovlar (super kontrakt to‘lovlari) asosida o‘qishga qabul qilingan va bilim darajasi juda past bo‘lgan talabalar tanish-bilishlarining yordami va moddiy manfaatdorlik evaziga kursdan-kursga o‘tishda noqonuniy harakatlarning sodir etilishi va bu harakatlarni boshqalarga salbiy taʼsir o‘tkazayotganligi;

- sirtqi va kechki taʼlim shaklidagi bo‘limlarda o‘qish jarayonlarining optimallashtirilmaganligi, pul berish yoki boshqa pulli xizmatlarni bajarish evaziga yakuniy nazoratlarni topshirishda talabalarning o‘zlari manfaatdor ekanligi;

- oraliq, yakuniy va kasbiy (ijodiy) imtihonlar, kurs ishlari va bitiruv malakaviy ishlarni qabul qilishda inson omilining saqlanib qolayotganligi va bu  jarayonlarning to‘liq raqamlashtirilmaganligi;

- dars mashg‘ulotlariga o‘z vaqtida qatnashmagan talabalardan qoldirilgan darslarni qayta o‘zlashtirishni (otrabotka) talab qilish uchun professor-o‘qituvchilarga qo‘shimcha ish haqi to‘lanmasligi;

- barcha oliy taʼlim muassasalarida mutaxassislik bo‘lmagan qo‘shimcha fanlarning o‘qitilishi;

- oliy taʼlim muassasalaridagi auditoriyalar videokuzatuv kameralari bilan jihozlanmaganligi;

Yuqoridagi omillarni bartaraf etish bo‘yicha quyidagilarni taklif etiladi:

- “HEMIS” platformasidan foydalanishda muhofaza va xavfsizlik  darajasini kuchaytirish, tizimdagi maʼlumotlarni o‘zgartirishga yo‘l qo‘ymaslik maqsadida umumiy boshqaruv vakolatini faqat tizim boshqaruvchisi (admin) zimmasiga yuklash;

- sohadagi yo‘nalishlarni, jumladan professor-o‘qituvchilar va pedagog xodimlarni lavozimlariga tayinlash jarayonlarini bosqichma-bosqich raqamlashtirish va shu yo‘l bilan inson omili ishtirokini kamaytirish;

- talabalardan qabul qilinadigan oraliq va yakuniy nazorat ishlarini yozma yoki og‘zaki shaklda topshirish tartibidan to‘liq voz kechgan holda axborot texnologiyalari yordamida test shaklida qabul qilish tizimini joriy etish;

- sirtqi va kechki taʼlim shakllarida tahsil olayotgan talabalarning davomatini qatʼiy nazoratga olish, darsda qatnashmaydigan talabalarga nisbatan kursdan-kursga qoldirish choralarini ko‘rish, bu haqda oliy taʼlim muassasalari rasmiy veb-sayti va ijtimoiy tarmoqlarga doimiy ravishda maʼlumotlar joylashtirib borish tizimini joriy etish;

- Korrupsiyaga qarshi kurashish  agentligi bilan kelishilgan holda oliy taʼlim muassasalari korrupsiyaga qarshi kurashish “komplayens-nazorat” tizimini boshqarish bo‘limlari xodimlarini shahodatlash bo‘yicha tegishli chora-tadbirlarni amalga oshirish, ularni malakasini oshirish bo‘yicha qisqa muddatli o‘quv kurslarini tashkil etish tizimini joriy qilish.

- korrupsiyaga qarshi kurashish bo‘limlari faoliyatini takomillashtirish, ular tomonidan amalga oshirilayotgan ishlarning taʼsir doirasini kuchaytirish, ushbu bo‘limlarni oliy taʼlim muassasalari rektorlari bo‘ysunuvidan chiqarib, vazirlikning tarkibiy tuzilmasi sifatida tashkil qilish;

- shaffoflik va ochiqlikni taʼminlash maqsadida dars mashg‘ulotlari o‘tadigan auditoriyalar (oraliq va yakuniy nazoratlarni qabul qilish) va o‘quv laboratoriyalarni videokuzatuv kameralari bilan to‘liq jihozlash,  ishlashini nazorat qilish uchun korrupsiyaga qarshi kurashish “komplayens-nazorat” tizimini boshqarish bo‘limlariga ulash;

- qurilish, taʼmirlash va xizmatlar ko‘rsatish sohalari uchun ajratilgan mablag‘lar o‘zlashtirilishining oldini olish uchun tashkilot va muassasalarda yuridik va jismoniy shaxslar bilan tuzilayotgan shartnomalarni har chorakning yakunida ichki auditorlik xizmatlari bilan hamkorlikda o‘rganish va natijasi bo‘yicha maʼlumotlarni vazirlik darajasida muhokama qilib borish;

- kasbiy (ijodiy) imtihonlarni Qoraqalpog‘iston Respublikasi, viloyatlar va Toshkent shahrida joylashgan hamda sohasi turdosh bo‘lgan oliy taʼlim muassasalari xodimlari tomonidan muassasa hududida qabul qilmaslikka erishish;

- talabalarni yotoqxonalarga joylashtirish bo‘yicha yagona elektron platformani joriy etish va vazirlik nazoratini taʼminlash;

- korrupsiyaviy holatlarning oldini olish, talabalar va pedagog xodimlarning huquqiy ongi va huquqiy madaniyatini yana-da yuksaltirish hamda korrupsiyaga nisbatan toqatsizlik munosabatini shakllantirishga qaratilgan tadbirlarni amalga oshirishda keng jamoatchilik nazoratini kuchaytirish;

- tizimda korrupsiyaga qarshi kurashish bo‘yicha amalga oshirilayotgan ishlarning taʼsirini kuchaytirish maqsadida har bir aniqlangan korrupsiyaviy holatlar bo‘yicha ko‘rilgan choralar xususidagi yakuniy maʼlumotlar bilan jamoatchilikni, birinchi navbatda, oliy taʼlim muassasalari talaba-yoshlari hamda jamoasini tanishtirib borish tizimini yo‘lga qo‘yish;

- tizimda korrupsiyaga qarshi  kurashish  sohasida  olib borilayotgan  ishlar davomida aniqlangan holatlar bo‘yicha ko‘rilgan choralarni oliy taʼlim muassasalarining rasmiy veb-saytlarida hamda ommaviy axborot vositalari va ijtimoiy tarmoqlarda keng yoritib borish.

- taʼlim jarayonida ochiqlik va shaffoflikni taʼminlash maqsadida talabalarning ota-onalari, ommaviy axborot vositalari va jamoatchilik vakillari ishtirokida fakultetlar kesimida korrupsiyaga qarshi kurashish sohasida olib borilayotgan ishlar bo‘yicha o‘quv yilida kamida bir marotaba “Ochiq eshiklar kuni” tadbirlarini o‘tkazishni joriy etish;

- korrupsiyaga qarshi kurash mavzusida huquq-tartibot idoralari, keng jamoatchilik vakillari ishtirokida o‘tkazilayotgan uchrashuvlar, davra suhbatlari va boshqa profilaktik tadbirlarning taʼsir darajasini oshirish;

Shuningdek, tizimda korrupsiyaviy omillar saqlanib qolayotganligi va korrupsiyaviy huquqbuzarliklar sodir etilayotganligini inobatga olib, quyidagilar tavsiya etiladi:

- vazirlik markaziy apparatida Komplayens-nazorat va korrupsiyaga qarshi kurashish bo‘limi shtatlari sonini ko‘paytirish (hozirda 2 nafar shtat mavjud);

- talabalarni xorijiy davlatlarga o‘qishga yuborishga ixtisoslashgan konsalting firmalariga vazirlik tomonidan litsenziya berish va nazorat qilish tartibini joriy qilish;

- elektron murojaat tizimi hamda talabalar fikrini o‘rganish bo‘yicha qayta aloqa (fidbek) tizimini keng joriy etish;

- davlat xaridlari va raqobatga oid qonun hujjatlari talablariga qatʼiy rioya qilinishini taʼminlash hamda ishtirokchilarning takliflarini baholashda faqatgina oldindan eʼlon qilingan mezonlarga asoslanish;

- korrupsiyaning oldini olish va unga qarshi kurashish bo‘yicha amaldagi qonunchilik hujjatlarining mazmun-mohiyatini soha xodimlariga keng tushuntirish;

- oliy taʼlim muassasalarining korrupsiyaga qarshi kurashish va komplayens-nazorat xizmati xodimlarini o‘qitish va malakasini oshirish;

- sohani raqamlashtirishni yana-da kengaytirish orqali qog‘ozbozlik, byurokratiya va korrupsiyani keskin qisqartirish.

Korrupsiyaga qarshi kurashish agentligi

Axborot xizmati