Joriy yilning 31-may kuni Korrupsiyaga qarshi kurashish agentligi direktori o‘rinbosari U.Tuxtasheva Yaponiyaning xalqaro hamkorlik agentligi (JICA) ekspertlar guruhini qabul qildi.

Uchrashuvda xorijiy tomondan JICA shtab-kvartirasining Sharqiy va Markaziy Osiyo va Kavkaz departamenti direktori o‘rinbosari K.Mishima, departament mutaxassisi S.Vatadani, JICAning O‘zbekistondagi vakolatxonasi vakillari N.Toki va Sh.Sharipov ishtirok etdi.
Uchrashuvdan maqsad o‘zaro samarali hamkorlikni yangi yo‘nalishlarda izchil davom ettirish, xususan, “O‘zbekistonda inson resurslarini rivojlantirishda Yaponiya ish tajribasidan foydalanish” ga qaratilgan yangi loyihaning maqsad-vazifalari hamda Agentlikning ushbu loyihada ishtiroki masalalarini muhokama qilishdan iborat bo‘ldi.

K.Mishima taʼkidlashicha, “O‘zbekistonda inson resurslarini rivojlantirishda Yaponiya ish tajribasidan foydalanish” migratsiya va masalalariga bag‘ishlangan bo‘lib, ushbu loyihada Agentlik ishtiroki masalalari ko‘rib chiqilmoqda.

Shunga ko‘ra, muloqot mobaynida loyihani O‘zbekistonda migratsiya sohasida korrupsiyaga qarshi kurashish borasidagi mavjud amaliyot va tajribaga moslashtirish imkoniyatlari yuzasidan o‘zaro fikr almashildi.

Jumladan, uchrashuvda migratsiya jarayonlarida korrupsiyaviy xavf-xatarlarning oldini olish, ularning vujudga kelmasligi uchun yangi mexanizmlarni yaratish va korrupsiya masalalariga oid maslahat “oyna”larini joriy etish kabi masalalar muhokama etildi.

Uchrashuv so‘nggida tomonlar loyihani birgalikda takomillashtirish va uni samarali amalga oshirishni tashkil etish yuzasidan o‘zaro muloqotlarni davom ettirishga kelishib oldilar.

Korrupsiyaga qarshi kurashish agentligi

Axborot xizmati