13-14-iyun kunlari Shimoliy Makedoniyada “YXHTning Iqtisodiy va Ekologik o‘lchovlar bo‘yicha Struga 2023 konferensiyasi” bo‘lib o‘tmoqda.

Maʼlumot uchun: Konferensiyada 57 ta ishtirokchi davlatning, xususiy sektor, ilmiy doiralar, fuqarolik jamiyati va xalqaro tashkilotlar vakillariga YXHT hududida keng qamrovli, umumiy, teng huquqli va ajralmas xavfsizlikni taʼminlash uchun ortib borayotgan muhim bo‘lgan yuqoridagi masalalar bo‘yicha mazmunli muhokamalar uchun platforma yaratildi. 

Ushbu tadbirning asosiy mavzusi “Barqaror rivojlanish, barqaror va inklyuziv iqtisodiy o‘sishga erishish orqali YXHT mintaqasida xavfsizlik va barqarorlikni taʼminlash” bo‘ldi.

Konferensiyada “Birgalikda samarali boshqaruv va korrupsiyaga qarshi kurash” masalasi alohida sessiyada muhokama qilindi.

Mazkur sessiya doirasida Korrupsiyaga qarshi kurashish agentligi direktori A.Burxanov “Davlat organlari faoliyatidagi ochiqlik va shaffoflik O‘zbekiston Respublikasida korrupsiyaga qarshi kurashishning muhim elementi sifatida” mavzusidagi maʼruzasida batafsil maʼlumot berdi.

Maʼruza davomida ishtirokchilarga so‘nggi yillarda O‘zbekistonda davlat rahbarining tashabbusi bilan davlat idoralari faoliyatining ochiqligi, shaffofligi va hisobdorligini taʼminlashga qaratilgan bir qator islohotlar amalga oshirilganligi, ushbu yo‘nalishdagi normativ-huquqiy hujjatlar bazasi tubdan takomillashtirilganligi, bu borada YEXHT bilan hamkorlik natijalari xorijiy ishtirokchilarga taqdim etildi.

Muhokamalar jarayonida ishtirokchi davlatlar tomonidan O‘zbekistonning korrupsiyaga qarshi kurashish jarayonlari, davlat organlarining ochiqligi va hisobdorligini taʼminlash borasida sezilarli yutuqlarga erishilayotgani eʼtirof etildi. Jumladan, davlat organlari va tashkilotlari tomonidan muhim maʼlumotlarning ochiqlanishi, ular asosida jamoatchilik nazoratining o‘rnatilayotgani yuzasidan aniq mexanizmlarga qiziqish bildirildi.