Joriy yilning 20-iyun kuni Xorazm viloyatida korrupsiyaga qarshi kurashish borasida amalga oshirilayotgan choralar tahlili hamda hududiy davlat organlari rahbarlarining korrupsiyaga qarshi kurashish borasidagi faoliyati yuzasidan axborotlari eshitishga qaratilgan yig‘ilish bo‘lib o‘tdi.

Qo‘shma yig‘ilish Korrupsiyaga qarshi kurashish agentligi, Oliy Majlis Senati Sud-huquq masalalari va korrupsiyaga qarshi kurashish qo‘mitasi hamda Xorazm viloyat korrupsiyaga qarshi hududiy kengashi tomonidan tashkil etildi.

Dastlab viloyatda korrupsiyaga qarshi kurashish borasidagi umumiy choralar, hududiy kengash faoliyati xususan, Korrupsiyaga qarshi kurashish agentligi tomonidan Xorazm viloyatida aprel-may oylarida o‘tkazilgan o‘rganishlar natijalari muhokama qilindi.

Unda Davlat idoralari tomonidan o‘tkazilgan davlat xaridlari, ochiqlik sohasida amalga oshirilgan ishlar va viloyat hokimligida korrupsiyaga qarshi ichki nazorat tuzilmasi faoliyatiga to‘xtalib o‘tildi.

Shuningdek, yig‘ilish davomida viloyatda o‘tgan davr mobaynida korrupsiyaviy holatlar eng ko‘p uchragan sog‘liqni saqlash, maktabgacha va maktab taʼlimi, bank, kadastr tizimi rahbarlarning axborotlari va kelgusidagi rejalari tinglandi.

Tadbir yakunda yo‘l qo‘yilgan kamchiliklarni bartaraf etishga qaratilgan qo‘shma qaror qabul qilinli. Qarorda hududiy kengash aʼzolari, viloyat masʼul tashkilotlari, korrupsiyaga qarshi kurashishga masʼul organlarga korrupsiyaviy xavf-xatarlarni bartaraf etish, ushbu jarayonlardan OAV va keng jamoatchilikni xabardor qilib borish bo‘yicha topshiriqlar belgilandi.