Mazkur davrda korrupsiyaga qarshi kurashish sohasida 5 ta normativ-huquqiy hujjatlar, jumladan,  3 ta O‘zbekiston Respublikasi Prezidenti Farmoni,  1 ta Idoraviy normativ-huquqiy hujjat qabul qilindi.

Xususan:

O‘zbekiston Respublikasi Prezidentining 2023-yil 25-yanvarda qabul qilingan “Respublika ijro etuvchi hokimiyat organlari faoliyatini samarali yo‘lga qo‘yishga doir birinchi navbatdagi tashkiliy chora-tadbirlar to‘g‘risida”gi Farmoni bilan vazirlik va idoralarning markaziy apparatlarida korrupsiyaga qarshi kurashish tuzilmalarini majburiy tartibda tashkil etish talabi belgilandi.

Prezidentning 2023-yil 24-maydagi “Yoqilg‘i-energetika sohasida davlat nazorati mexanizmlarini takomillashtirish va “Raqamli energonazorat” tizimini joriy etish to‘g‘risida”gi Farmoniga asosan, yoqilg‘i-energetika sohasidagi qonunchilik hujjatlaridagi korrupsiyaviy omillarni muntazam ravishda tahlil qilish asosida ushbu sohani “korrupsiyasiz soha”ga aylantirish belgilandi.

Shuningdek, Prezidentning 2023-yil 20-iyundagi “Maʼmuriy islohotlar doirasida suv xo‘jaligi sohasida davlat boshqaruvini samarali tashkil qilish chora-tadbirlari to‘g‘risida”gi Farmoni bilan sohada korrupsiyaga qarshi kurashishning tashkiliy-huquqiy va moliyaviy mexanizmlarini takomillashtirish bo‘yicha 2023 yilga mo‘ljallangan idoraviy dastur ishlab chiqish va tasdiqlash, vazirlik va tizim tashkilotlari kesimida korrupsiya avj olgan sohalar, uning rivojlanish sabablari va shartlarini o‘rganish hamda korrupsiya omillarini bartaraf etish belgilandi.

Bundan tashqari, Korrupsiyaga qarshi kurashish agentligi direktorining 54-son Buyrug‘i bilan “Davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlar munosabati bilan olinishi mumkin bo‘lgan sovg‘a qiymati, shuningdek, uni tasarruf etish tartibi to‘g‘risida”gi nizom tasdiqlandi.

Hisobot davrida Korrupsiyaga qarshi kurashish agentligi tomonidan davlat va jamiyat hayotining turli sohalarida korrupsiyaning kelib chiqishiga sabab bo‘layotgan omillarni aniqlash va tahlil qilish maqsadida 20 dan ortiq yo‘nalishda o‘rganishlar olib borilib, natijalari yuzasidan O‘zbekiston Respublikasi Prezidenti Administratsiyasi va boshqa tashkilotlarga 25 ta tahliliy maʼlumot kiritildi.

Agentlikka joriy yilning 1-yarim yilligida  jami 1 562 ta murojaat kelib tushgan bo‘lib, shundan 1 535 tasining ko‘rib chiqilishi taʼminlandi, 35 ta murojaat bugungi kunda ko‘rib chiqilmoqda.

Murojaatlarni ko‘rib chiqish natijalari bo‘yicha tegishli vazirlik va idoralarga, viloyat (tuman, shahar) hokimliklariga 18 ta so‘rovnoma yuborildi, qonunbuzilishi holatlarini bartaraf etish yuzasidan 13 ta taqdimnoma kiritildi.

Murojaatlarni o‘rganish natijasi asosida 6 nafar shaxs intizomiy javobgarlikka tortilgan, 1 nafar davlat idorasi xodimi bilan mehnat shartnomasi bekor qilingan, 4 ta qabul qilingan qaror bekor qilingan,  4 ta jinoyat ishi, 3 ta maʼmuriy ish  qo‘zg‘atilgan va mavjud xato-kamchiliklarni bartaraf etish choralari ko‘rilgan.

Davlat xaridlariga oid qonunchilik talablariga rioya qilinishi yuzasidan o‘tkazilgan masofaviy monitoringlar yakuniga ko‘ra:

1)  vazirlik va idoralarga 85 mlrd so‘mlik eʼlon qilingan xaridlar bo‘yicha korrupsiyaviy huquqbuzarliklarning sabab va shart-sharoitlarini bartaraf qilishga qaratilgan 110 ta taqdimnoma kiritildi.

Natijada 83 ta davlat xaridi bekor qilinib, 44 nafar masʼul shaxsga nisbatan intizomiy jazo choralari qo‘llanildi.

2)  davlat moliyaviy nazorat inspeksiyasiga 57 mlrd so‘mlik davlat xaridlari bo‘yicha huquqiy baho berish uchun 43 ta so‘rovnoma yuborildi.

Natijada  Davlat moliyaviy nazorat inspeksiyasi tomonidan davlat xaridlarini amalga oshirishda qonunbuzilishi holatlariga yo‘l qo‘ygan mansabdor shaxslarga nisbatan 21 ta maʼmuriy ish qo‘zg‘atildi.

3)  huquqni muhofaza qiluvchi organlarga 284 mlrd so‘mlik davlat xaridlari bo‘yicha huquqiy baho berish uchun 68 ta so‘rovnoma yuborildi.

Natijada huquqni muhofaza qiluvchi organlar tomonidan davlat xaridlarini amalga oshirishda qonunbuzilishi holatlariga yo‘l qo‘ygan mansabdor shaxslarga nisbatan 15 ta maʼmuriy ish va 12 ta jinoyat ishi qo‘zg‘atildi.

Agentlik tomonidan O‘zbekiston Respublikasi Prezidentining 2022 yil 14 iyundagi PF-154-son Farmoniga muvofiq, 2022 yilda davlat organlari va tashkilotlari faoliyati ochiqligini taʼminlashdagi samaradorlik va yo‘l qo‘yilgan kamchiliklar tahlil qilinib, maqsadli indikatorlar asosida baholangan “Ochiqlik indeksi” shakllantirildi.

Ochiqlik indeksini baholashda umumiy 86 ta vazirlik, idora va muassasalarning ochiqlik faoliyati 0 balldan 100 ballgacha reytingda baholanib, unga ko‘ra  15 ta davlat organining ochiqlikni taʼminlash faoliyati “yashil” – (71-100 ball), 44 ta tashkilot “sariq” – (55-71 ball) va 27 ta tashkilot “qizil” – (55 balldan past) toifalarga ajratildi.

“Ochiqlik indeksi”ni baholash tizimi to‘liq raqamlashtirilgan holda “Open.index” platformasi orqali amalga oshirilib, keng jamoatchilikka sohada amalga oshirilgan ishlarning samaradorlik va natijadorlik ko‘rsatkichlarini real vaqt rejimida kuzatish imkoniyati yaratildi.

O‘zbekiston Respublikasi Prezidentining 2021-yil 16-iyundagi PF-6247-son Farmoniga asosan, davlat organlari va tashkilotlarida ochiqlikka oid qonun hujjatlari ijrosi masofaviy tarzda o‘rganilib, ularning natijalari bo‘yicha vazirlik va idoralarga 7 ta taqdimnoma kiritilishi taʼminlandi.

Agentlik hamda Konrad Adenauer jamg‘armasining O‘zbekistondagi vakolatxonasi hamkorligida joriy yilning 16-17 may kunlari Buxoro shahrida ilk marotaba “Davlat idoralari faoliyati ochiqligi bo‘yicha Markaziy Osiyo davlatlari forumi” o‘tkazildi.

O‘zbekiston Respublikasi Prezidentining 2021-yil 6-iyuldagi PQ-5177-son Qaroriga muvofiq,  bugungi kunda 87  ta davlat organlari va tashkilotlari, shu jumladan banklarda korrupsiyaga qarshi ichki nazorat tuzilmalari faoliyat olib bormoqda.

Joriy yilning birinchi yarim yilligida Agentlik tomonidan 20 ta vazirlik va idoralarda hamda mahalliy hokimliklarda ichki nazorat tizimi faoliyatining yo‘lga qo‘yilganlik holati joyiga chiqqan holda o‘rganildi. O‘rganish natijalariga ko‘ra, ular faoliyatini takomillashtirish bo‘yicha uslubiy ko‘mak ko‘rsatildi, shuningdek, vazirlik va idoralarga ushbu yo‘nalishdagi faoliyatni samarali tashkil etishga qaratilgan 5 ta taqdimnoma kiritildi, 1 ta ogohlantirish yuborildi. 15 ta davlat organlari va tashkilotlarida korrupsiyaga qarshi ichki nazorat tuzilmalari rahbarlari ochiq tanlov asosida ishga qabul qilinishi taʼminlandi.

Joriy yilda O‘zbekiston Respublikasi Prezidentining 2022-yil 12-yanvardagi PQ-81-son qaroriga muvofiq, davlat organlari va tashkilotlarida korrupsiyaga qarshi kurashish ishlarining samaradorligi reyting baholashdan o‘tkazildi.  Unda 62 ta davlat tashkilotining korrupsiyaga qarshi kurashish ishlarining samaradorligi 0 balldan 100 ballgacha reytingda baholanib, 12 ta tashkilot faoliyat samaradorligi “yaxshi” – (81-100 ball), 30 ta tashkilot “qoniqarli” – (55-80 ball) va 20 ta tashkilot “qoniqarsiz” –  (55 balldan past) toifalarga ajratildi.

 Shuningdek, O‘zbekiston Respublikasi Prezidentining 2022-yil 11-maydagi PQ-240-son qaroriga asosan, 39 ta vazirlik va idoralarning umumiy 1701 ta funksiyalaridagi korrupsiyaviy xavf-xatarlar baholashdan o‘tkazilib, korrupsiyaviy xavf-xatarlar darajasi 177 ta funksiyalarda “yuqori”, 475 ta funksiyalarda “o‘rta”, 1049 ta funksiyalarda “past” deya baholandi.

2023-yilning aprel oyida Korrupsiyaga qarshi kurashish Milliy kengashining navbatdagi yig‘ilishi tashkil etilib, unda davlat organlari va tashkilotlarida korrupsiyaga qarshi kurashish ishlarining samaradorligini reyting baholash natijalari ko‘rib chiqildi va reyting baholash natijalariga ko‘ra “qoniqarsiz” baholangan  tashkilotlar rahbarlarining hisobotlarini eshitish belgilandi.

Bundan tashqari, Yig‘ilish bayoni bilan Milliy kengashning 2023-yil birinchi yarim yilligiga mo‘ljallangan Ish rejasi, fuqarolik jamiyati institutlarining korrupsiyaga qarshi kurashishdagi rolini oshirishga qaratilgan Chora-tadbir rejalari tasdiqlandi.

Qoraqalpog‘iston Respublikasi, viloyatlar va Toshkent shahar korrupsiyaga qarshi kurashish hududiy kengashlarining faoliyatini reyting baholash metodikasiga asosan 14 ta hududning 2022 yildagi  faoliyati baholandi va reyting baholash natijalari Milliy kengashga taqdim etildi.

Oliy Majlis Senati hamda Korrupsiyaga qarshi kurashish agentligi hamkorligida Buxoro, Toshkent va Xorazm viloyatlari hududiy kengashlarining navbatdagi yig‘ilishlari tashkil etilib, unda korrupsiyaga qarshi kurashish bo‘yicha amalga oshirilayotgan ishlar yuzasidan hududiy davlat organlari rahbarlarining axborotlari eshitildi.

Korrupsiyaga qarshi kurashish bo‘yicha xalqaro hamkorlik doirasida BMT TD, BMT GJB, Jahon banki, YXHT, Germaniya jamiyati vakolatxonasi,  “Mintaqaviy muloqot” xalqaro nodavlat tashkiloti hamda AQSH,  Fransiya, Sloveniya, Finlandiya, Estoniya, Malayziya, Qozog‘iston kabi bir qator xorijiy davlatlarning korrupsiyaga qarshi kurashishga masʼul idoralari bilan doimiy hamkorlik aloqalari yana-da rivojlantirildi.  Jumladan, Agentlik hamda Fransiya Respublikasi Korrupsiyaga qarshi kurashish agentligi o‘rtasida hamkorlik to‘g‘risida Memorandumini amalga oshirish bo‘yicha Chora-tadbirlar rejasi ishlab chiqildi va tasdiqlandi.

Agentlik hamda Yevropada xavfsizlik va hamkorlik tashkiloti o‘rtasida “O‘zbekistonda korrupsiyaga qarshi kurashishga ko‘maklashish” loyihasining ikkinchi fazasi amalga oshirilmoqda.

Xalqaro hamkorlar bilan birgalikda 10 ga yaqin yirik anjumanlar tashkil etildi.

Korrupsiyaga qarshi kurashish agentligi

Axborot xizmati