O‘zbekiston davlat sanʼat va madaniyat instituti buyurtmachiligida 2023-yil 4-iyul kuni quyosh fotoelektr stansiyasini xarid qilish va o‘rnatish yuzasidan1 mlrd 650 mln so‘mlik davlat xaridi o‘tkazilgan. 

 Korrupsiyaga qarshi kurashish agentligi tomonidan olib borilgan o'rganishda mazkur davlat xaridida O‘zbekiston Respublikasi “Davlat xaridlari to‘g‘risida”gi Qonunning 32-moddasi (baholash mezonlari va tartib-taomillariga taalluqli qoidalar), 46-moddasi (davlat xaridlari jarayonidagi cheklovlar) talablari buzilganligi va boshqa qonunbuzilish holatlariga yo‘l qo‘yilganligi  aniqlandi.

Xususan, ushbu xaridda ishtirokchilarning takliflari xarid qilish hujjatlarida ko‘rsatilgan baholash mezonlari va tartib-taomillariga zid ravishda baholangan.

Mazkur holatlar bo‘yicha 2023-yil 21-iyul kuni xarid komissiyasining bayonnomasini bekor qilish to‘g‘risida buyurtmachiga taqdimnoma kiritildi va qonuniy chora ko‘rish uchun to‘plangan hujjatlar Bosh prokuratura huzuridagi Iqtisodiy jinoyatlarga qarshi kurashish departamentiga yuborildi.

Agentlikning taqdimnomasiga binoan O‘zbekiston davlat sanʼat va madaniyat instituti tomonidan 24-iyul kuni xarid komissiyasining bayonnomasi bekor qilindi.

Korrupsiyaga qarshi kurashish agentligi

Axborot xizmati