Joriy yilning 20-21-sentabr kunlari Korrupsiyaga qarshi kurashish agentligi direktori A.Burxanov boshchiligidagi Ishchi guruh tomonidan Andijon viloyatida o‘tkazilgan o‘rganishlar doirasida Andijon davlat tibbiyot instituti  faoliyati misolida  oliy taʼlim, sog‘liqni saqlash tizimlarida  “Korrupsiyasiz soha” loyihasining amalga oshirilishi holati bilan tanishildi. 

Mazkur jarayonda Institut rahbariyati tomonidan simulyatsiya, IT-markazlari va ularda talabalarning ishlash jarayonlari, Institut klinikasi va yangi o‘quv binosida amalga oshirilayotgan qurilish ishlari va ularning zamon talablariga mos tibbiy asbob-uskunalar bilan jihozlanayotganligi haqida taqdimot qilindi. 

O‘rganish mobaynida Ishchi guruh korrupsiyaning oldini olish va unga nisbatan murosasiz munosabatni shakllantirishda bu kabi chora-tadbirlar sifati va salmog‘ini oshirish, jumladan, talaba-yoshlar o‘rtasida korrupsiya va uning oqibatlariga qarshi kurashishni kuchaytirishga qaratilgan videoroliklar tayyorlash yuzasidan tavsiyalar berildi.

Andijon shahar Davlat xizmatlari markazida esa davlat xizmatlarini ko‘rsatishda korrupsiya, byurokratizm, sansalorlik va boshqa maʼmuriy to‘siqlarni bartaraf etish  imkoniyatlarini kengaytirish borasida amalga oshirilayotgan ishlar o‘rganildi.

Taʼkidlanishicha, Markazda murojaatchilarga bir vaqtning o‘zida 300 dan ortiq turdagi xizmatlarni shaffof, qulay va tezkor ko‘rsatish imkoni mavjud. Bu yerda elektron navbat tizimi, axborot kioskasi, elektron xizmatlardan mustaqil foydalanish qulayliklari yaratilgan.

Shuningek, elektron navbat tizimi bilan integratsiya qilingan maxsus platforma mavjud bo‘lib, uning yordamida mijozlar xizmat ko‘rsatish jarayoni va xizmat ko‘rsatgan xodimni baholash imkoniga ega. 

O‘rganish mobaynida davlat xizmatlarini ko‘rsatishda inson omilini minimillashtirish, korrupsiyaga olib kelishi mumkin bo‘lgan har qanday xizmatlarni raqamlashtirish orqali  korrupsiya va byurokratiya holatlarining oldini olishga qaratilgan ishlarni izchil davom ettirish yuzasidan taklif va tavsiyalar berildi. 

Korrupsiyaga qarshi kurashish agentligi 
Axborot xizmati