Korrupsiyaga qarshi kurashish agentligi tomonidan O‘zbekiston Respublikasi Prezidentining 2022-yil 12-yanvardagi “Korrupsiyaga qarshi kurashish ishlarining samaradorligini reyting baholash tizimini joriy etish chora-tadbirlari to‘g‘risida”gi PQ-81-son qaroriga asosan davlat organlarining korrupsiyaga qarshi kurashish bo‘yicha faoliyati samaradorligini baholashdan o‘tkazib borish belgilangan.

Mazkur baholash ishlarining xolisligi va shaffofligini taʼminlash maqsadida reyting baholashni mustaqil amalga oshiruvchi ekspertlar guruhini shakllantirish rejalashtirilgan.

Ekspertlar qoida tariqasida quyidagi talablarga javob berishi kerak:

- O‘zbekiston Respublikasi fuqarosi bo‘lishi;

- oliy maʼlumotga ega bo‘lishi;

- mutaxassisligi bo‘yicha kamida 5 yillik ish stajiga ega bo‘lishi;

- korrupsiyaning oldini olish va unga qarshi kurashish sohasida bilim va ko‘nikmalarga ega bo‘lish.

Ekspertlar guruhi Agentlik direktori buyrug‘iga asosan 9 kishidan iborat tarkibda shakllantirilib, guruhning kamida 3 nafar aʼzosi guruh ishida ishtirok etishni bildirgan fuqarolik jamiyati institutlari vakillari orasidan tanlab olinadi.

Shunga ko‘ra, ekspertlar guruhi ishida ishtirok etish istagini bildirsangiz, ushbu arizani to‘ldirib, 2023-yil 15-noyabriga qadar info@anticorruption.uz elektron pochta manziliga bu haqda xabar berishingizni so‘raymiz.

Korrupsiyaga qarshi kurashish agentligi

Axborot xizmati