“III Toshkent Aksilkorrupsiya forumi” doirasida Korrupsiyaga qarshi kurashish agentligi direktori A.Burxanov hamda Tojikiston Respublikasi Davlat moliyaviy nazorati va korrupsiyaga qarshi kurashish agentligi rahbari S.Sulaymon Said o‘rtasida uchrashuv bo‘lib o‘tdi.

Muloqot avvalida Agentlik va Tojikiston Respublikasi Davlat moliyaviy nazorati va korrupsiyaga qarshi kurashish agentligi o‘rtasidagi hamkorlik Memorandumi har ikki tomon mutaxassislarining bilim va malakasini oshirish, ayniqsa, korrupsiyaga oid huquqbuzarliklarning oldini olishda ijobiy samara berayotgani, bu borada to‘plangan tajriba faoliyatni takomillashtirishga xizmat qilayotgani alohida eʼtirof etildi.

Uchrashuvda o‘zaro samarali hamkorlikni izchil davom ettirish va yangi bosqichga olib chiqish, amalga oshirilayotgan loyihalar ko‘lamini yana-da kengaytirish maqsadida Memorandum bo‘yicha 2024-2025 yillarga mo‘ljallangan chora-tadbirlar rejasi imzolandi.

Unda hamkorlikning turli yo‘nalishlari qamrab olingan bo‘lib, jumladan, korrupsiyaga qarshi kurashish sohasida ommaviy axborot vositalari va fuqarolik jamiyati institutlari bilan hamkorlikni kuchaytirish, aholining huquqiy savodxonligini oshirish, shuningdek, normativ-huquqiy hujjatlar va ularning loyihalarini korrupsiyaga qarshi ekspertizadan o‘tkazish, taʼlim va sog‘liqni saqlash sohasida shaffoflikni taʼminlash, korrupsion xavflarni aniqlash va bartaraf etish bo‘yicha o‘zaro tajriba almashish masalalari ko‘zda tutilgan.

Muloqot davomida shu va boshqa vazifalar muhokama qilinib , ularning ijrosini to‘liq taʼminlashga kelishib olindi.

Korrupsiyaga qarshi kurashish agentligi

Axborot xizmati