Korrupsiyaga qarshi kurashish agentligi tomonidan Uchqo‘rg‘on tuman hokimligi buyurtmachiligida o‘tkazilgan tanlov natijalari o‘rganildi.

Joriy yilning 5-may kuni “kun.uz” saytida “Namanganda 259 mln. so‘mlik davlat buyurtmasi bo‘yicha tender bir shaxsga qarashli korxonalar o‘rtasida o‘tkazildi” mavzusida maqola e’lon qilingan.

Aniqlanishicha, Uchqo‘rg‘on tuman hokimining 2021-yil 16-apreldagi 76-F-sonli farmoyishiga asosan “Norin” daryosi chap qirg‘og‘ida joylashgan yemirilgan dambani 200 metr qismini shag‘allash orqali joriy ta’mirlash belgilangan.

Ushbu farmoyishga asosan Uchqo‘rg‘on tuman hokimligi buyurtmachiligida 2021-yil 20-aprelda “dxarid.uz” saytiga 7103632-sonli lot raqami va 259 mln. so‘m boshlang‘ich narx bilan tanlov e’loni joylashtirilgan.

Tanlovda “Mirzoxidmirzo Mirzobaxrom Mirzamurod” MCHJ,  “Mirzoxidmirzo O‘rkinmirzo Mirzabaxrom” MCHJ, “Sherzod Begzod Nilufar” MCHJ qatnashgan bo‘lib, tanlov natijalariga asosan “Mirzoxidmirzo Mirzobaxrom Mirzamurod” MCHJ tomonidan berilgan 258,2 mln.so‘mlik taklif g‘olib bo‘lgan.

O‘rganishda, M.K. “Mirzoxidmirzo Mirzobaxrom Mirzamurod” MCHJda,  “Mirzoxidmirzo O‘rkinmirzo Mirzabaxrom” MCHJda, “Sherzod Begzod Nilufar” MCHJda ta’sis ulushiga ega ekanligi aniqlandi.

“Dalvat xaridlari to‘g‘risida”gi Qonunning 36-moddasida, davlat buyurtmachisi g‘olib bo‘lgan taklif akseptiga qadar istalgan vaqtda davlat xaridini bekor qilish huquqiga egaligi belgilangan.

Shunga ko‘ra, mazkur tanlov natijalari Uchqo‘rg‘on tuman hokimligi tomonidan “Davlat xaridlari to‘g‘risida”gi Qonunning 36-moddasiga asosan bekor qilingan.