2021-yil 20-may kuni Ozarbayjon Respublikasi Bosh prokurori Kamran Aliyevning taklifiga binoan O‘zbekiston Respublikasi Korrupsiyaga qarshi kurash agentligi direktori Akmal Burxanov boshchiligidagi delegatsiya Ozarbayjonga tashrifini boshladi.

Tashrif O‘zbekistonning Ozarbayjondagi elchixonasi ko‘magida tashkil etildi.

Tashrifning uchrashuvlar qismi Ozarbayjon Respublikasi Bosh prokuraturasida ikki mamlakat delegatsiya o‘rtasidagi muloqot bilan boshlandi. Ozarbayjon Respublikasi Bosh prokurori Kamran Aliyev mamlakatda demokratik va huquqiy davlat barpo etish borasida amalga oshirilgan ishlar, xalqaro tajriba, yangi institutsional mexanizmlarni hisobga olgan holda milliy qonunchilikni yanada takomillashtirish bo‘yicha islohotlar haqida ma’lumot berdi. Fuqarolarga xizmat ko‘rsatish orqali byurokratik to‘siqlarni bartaraf etishda muhim rol o‘ynaydigan "ASAN xizmat" va "DOST" markazlari faoliyati to‘g‘risida ma’lumot berdi. Bosh prokuror o‘z nutqida mamlakat amaliyotida shaffoflik va sifat mezonlarini hisobga olgan holda kompleks chora-tadbirlarning aniq misollariga to‘xtalib o‘tdi.

O‘z navbatida O‘zbekiston Respublikasi Korrupsiyaga qarshi kurashish agentligi direktori Akmal Burxanov samimiy qabul uchun minnatdorchilik bildirib, O‘zbekiston Respublikasida yangi bosqichga ko‘tarilgan sud-huquq va inson manfaatlarini ta’minlash yo‘lidagi islohotlar to‘g‘risida ma’lumot berdi. Ayniqsa, so‘nggi yillarda korrupsiyaga qarshi kurashish sohasida amalga oshirilgan institutsional o‘zgarishlarga to‘xtalib o‘tib, ushbu yo‘nalishda tajriba almashish tomonlar uchun foydali bo‘lishini qayd etib o‘tdi.

Uchrashuvda ta’kidlanganidek, har ikki mamlakatda amaldagi siyosiy iroda tufayli, poraxo‘rlik va korrupsiyaga qarshi kurash ustuvor vazifalardan biri bo‘lib, normativ-huquqiy hujjatlar va strategik harakatlar samarali amalga oshirilmoqda.

Tashrif davomida tomonlar huquqiy sohadagi hamkorlik to‘g‘risida fikr almashdilar. Xalqaro tashkilotlar doirasidagi o‘zaro aloqalar samaradorligi, huquqiy hamkorlik sohasidagi mavjud kelishuvlar bazasini takomillashtirish masalalarini muhokama qilishdi.

Ayni paytda O‘zbekiston Respublikasi Korrupsiyaga qarshi kurashish agentligi delegatsiyasi tashrifi davom etmoqda.