O‘zbekiston Respublikasi Korrupsiyaga qarshi kurashish agentligi vakillari tashrif davomida Ozarbayjon Respublikasi Milliy Majlisining Mudofaa, xavfsizlik va korrupsiyaga qarshi kurashish qo‘mitasi raisi va boshqa bir qator deputatlar bilan uchrashuv o‘tkazdi.

Uchrashuv davomida korrupsiyaga qarshi kurashish tizimida parlamentning o‘rni, ijro organlari bilan o‘zaro hamkorlik va boshqa masalalar muhokama qilindi.

Ozarbayjon parlamenti mas’ul qo‘mitasi tomonidan qonun loyihalarini qabul qilishda korrupsiyaga qarshi ekspertizadan o‘tkazish va bu borada qo‘llanilayotgan parlament nazorati shakllari to‘g‘risida ma’lumotlar berildi.

Ozarbayjon Respublikasi Oliy sudi rahbariyati bilan o‘tkazilgan uchrashuvda odil sudlov samaradorligi va sudyalar lavozimiga tanlovlarni yangicha, ochiq va shaffof tarzda o‘tkazish, shuningdek, sud tizimida korrupsiyaga qarshi kurashishning zamonaviy mexanizmlari borasida fikr almashildi.

Shu bilan birga, Ozarbayjon sud organlari vakillari tomonidan korrupsiyaning oldini olish maqsadida va qonunni qo‘llash yagona amaliyotini joriy etish maqsadida milliy qonunchilikdagi o‘zgarish va yangiliklar haqida ma’lumot berildi.