O‘zbekiston Respublikasi Prezidentining 2020 yil 29 iyundagi farmoniga asosan, respublikamizning barcha hududlarida korrupsiyaga qarshi kurashish hududiy kengashlari tashkil etish vazifasi qo‘yilgan edi. 
Mazkur vazifa ijrosini ta’minlash maqsadida joriy yilning 22 sentabr kuni Andijon viloyati Korrupsiyaga qarshi kurashish hududiy Kengashining ta’sis yig‘ilishi bo‘lib o‘tdi. Yig‘ilishda Korrupsiyaga qarshi kurashish milliy kengashi a’zolari, Korrupsiyaga qarshi kurashish agentligi, viloyat hokimligi rahbariyati hamda keng jamoatchilik vakillari ishtirok etishdi.
Yig‘ilish avvalida, so‘nggi yillarda mamlakatimizda korrupsiyaga qarshi kurashish davlat siyosatining ustuvor yo‘nalishiga aylangani, bu borada ko‘plab normativ-huquqiy hujjatlar qabul qilingani natijasida bir qator ijobiy o‘zgarishlar amalga oshirilgani ta’kidlandi. 
 

Shu bilan birga, ko‘rilayotgan tizimli choralarga qaramasdan, hududlarda budjet mablag‘laridan foydalanish, davlat xaridlari, kapital qurilish kabi yo‘nalishlarda korrupsiya holatlari saqlanib qolayotganligi, xususan, Andijon viloyatida 2019-2020 yillar hamda 2021 yilning o‘tgan davrida jami 843 nafar turli darajadagi mansabdor shaxslar korrupsion jinoyat sodir etganligi uchun jinoiy javobgarlikka tortilgani qayd etildi.
Ushbu raqamning o‘zi yangi tashkil etilayotgan hududiy kengash oldida amalga oshirilishi lozim bo‘lgan choralar ko‘lami nihoyatda katta ekanligini ko‘rsatib turibdi.
 

Yig‘ilish davomida hududiy kenashlarning asosiy vazifa va maqsadlariga ham to‘xtalib o‘tildi. Xususan,
- Andijon viloyatida korrupsiyaga qarshi kurashish bo‘yicha faoliyatni amalga oshiruvchi va unda ishtirok etuvchi organlar va tashkilotlar faoliyati samaradorligini oshirishga qaratilgan qarorlar qabul qilish; 
- Korrupsiyaga qarshi kurashish bo‘yicha Milliy kengashga qonun hujjatlarini va huquqni qo‘llash amaliyotini takomillashtirish yuzasidan takliflar kiritish;
- korrupsiyaga qarshi kurashish bo‘yicha faoliyatni amalga oshiruvchi hududiy davlat organlari rahbarlarining hisobotlarini va ma’ruzalarini eshitish. 
Bundan tashqari viloyat miqyosida korrupsiyaga sabab bo‘layotgan omillarni aniqlagan holda hududiy kengashning aniq chora-tadbirlarini ishlab chiqish hamda har bir a’zoning mas’uliyat bilan yondoshishini ta’minlashga oid qarorlar qabul qilindi.