Davlatimiz rahbarining “O‘zbekiston Respublikasida Korrupsiyaga qarshi kurashish tizimini takomillashtirish bo‘yicha qo‘shimcha chora-tadbirlar to‘g‘risida”gi Farmoni bilan Korrupsiyaga qarshi kurashish bo‘yicha respublika idoralararo komissiyasi va uning hududiy idoralararo komissiyalari O‘zbekiston Respublikasi korrupsiyaga qarshi kurashish milliy kengashi (keyingi o‘rinlarda — Milliy kengash) va uning hududiy kengashlari etib qayta tashkil etilishi belgilab berilgan edi.

Bugun Farg‘ona viloyati hokimligida belgilangan rejaga asosan Korrupsiyaga qarshi kurashish Farg‘ona viloyati hududiy kengashining ta’sis majlisi bo‘lib o‘tdi. Unda O‘zbekiston Respublikasi korrupsiyaga qarshi kurashish agentligi direktori o‘rinbosari Umida Tuxtasheva, Milliy kengash a’zolari, viloyat hokimining o‘rinbosari Xurshidjon Ahmedov, viloyatdagi daxldor tashkilot va boshqarmalar rahbarlari hamda OAV vakillari qatnashdilar.

Kun tartibiga ko‘ra dastlab O‘zbekiston Respublikasi korrupsiyaga qarshi kurashish milliy kengashining 2021 yil 17 sentabrdagi yig‘ilishida tasdiqlangan viloyat hududiy Kengashi a’zolari tanishtirildi.

Shundan so‘ng, ma’ruzachilar tomonidan korrupsiyaga qarshi kurashish yo‘nalishida amalga oshirilayotgan chora-tadbirlarga qaramay, joylarda korrupsion jinoyatlar sodir etilish salmog‘i hamon saqlanib kelinayotganligi qayd etildi.

Bunday qonunbuzilish holatlariga barham berish, viloyatda korrupsiyaga illatiga nisbatan murosasiz munosabatni shakllantirish maqsadida endilikda hududiy kengashlar faoliyat yuritishi va ular korrupsiyaga qarshi kurashish sohasidagi davlat va boshqa dasturlarning amalga oshirilishini tashkil etishi, aholining huquqiy ongi va huquqiy madaniyatini yuksaltirishga chora-tadbirlarni ishlab chiqish kabi vazifalar ijrosini ta’minlash ko‘zda tutilgan.

Bu borada Kengashning har bir a’zosiga amalga oshirishi lozim bo‘lgan vazifalarni aniq belgilash, bunda jamoatchilik va ommaviy axborot vositalari bilan faol ishlash, targ‘ibot-tashviqot faoliyatiga alohida e’tibor qaratish, viloyatdagi boshqarma va tashkilotlar o‘z tizimidagi qonunchilik bazasini inventarizatsiyadan o‘tkazib, korrupsiya hamda byurokratik omillarga sabab bo‘luvchi normalarni bartaraf etish yuzasidan tegishli takliflarni Milliy kengashga taqdim etishi lozimligi qayd etildi.

Yakunda ko‘rilgan masalalar yuzasidan tegishli qarorlar qabul qilindi hamda oldinda turgan muhim vazifalar belgilab olindi.