Joriy yilning 23-sentabr kuni Korrupsiyaga qarshi kurashish agentligi direktori o‘rinbosari Umida Tuxtasheva va Osiyo taraqqiyot banki vakillari ishtirokida onlayn uchrashuv tashkil etildi.

Ma’lumot uchun: O‘zbekiston Respublikasi bilan Osiyo Taraqqiyot banki o‘rtasidagi hamkorlik 1995 yil avgust oyidan boshlab yo‘lga qo‘yilgan.

O‘zbekiston Respublikasining Osiyo Taraqqiyot banki bilan o‘zaro hamkorlik O‘zbekiston Respublikasi Vazirlar Mahkamasining 1998 yil 30 apreldagi “Osiyo rivojlanish banki bilan hamkorlikni rivojlantirish chora-tadbirlari to‘g‘risida”gi 186-sonli qaroriga muvofiq yo‘lga qo‘yilgan.

1997 yildan buyon Toshkent shahrida Osiyo Taraqqiyot bankining vakolatxonasi faoliyat ko‘rsatib keladi.

Tadbirni dastlab, Osiyo taraqqiyot bankining loyiha menejeri Ch.Akin ochib, Osiyo taraqqiyot bankining O‘zbekistondagi faoliyati, mamlakatdagi davlat boshqaruvi tizimini rivojlantirish sohasidagi olib borilgan loyihalar haqida qisqacha to‘xtalib o‘tdi.

Shundan so‘ng Agentlik direktori o‘rinbosari U. Tuxtasheva O‘zbekiston Respublikasining korrupsiyaga qarshi kurashish siyosati, bu borada olib borilayotgan so‘nggi islohotlar, Agentlik faoliyat yo‘nalishlari va yuklatilgan vazifalar haqida tanishtirdi.

Muloqot davomida Osiyo taraqqiyot banki tomonidan “Iqtisodiy boshqaruvni takomillashtirish dasturi”ning keyingi bosqichi ishga tushirilishi va ushbu loyihada Agentlikning roli alohida e’tirof etildi. Bundan tashqari, davlat organlarida korrupsiyaga qarshi ichki nazorat tizimi («komplayens-nazorat») va davlat xaridlari sohasida korrupsiyaga qarshi nazorat tizimini isloh qilishda va Agentlikni boshqa yo‘nalishlarda qo‘llab quvvatlash masalasini ko‘rib chiqilishi ta’kidlandi.

O‘zaro muloqot tarzida tashkil etilgan mazkur uchrashuv yakunida ikki taraf vakillari tomonidan hamkorlik aloqalarini yo‘lga qo‘yish, shu jumladan hamkorlikda korrupsiyaga qarshi kurashish yo‘nalishida loyihalar ishga tushirilishi yuzasidan kelishib olindi.