Hududlarda korrupsiyaga qarshi kurashish bo‘yicha faoliyatni amalga oshiruvchi va unda ishtirok etuvchi organlar hamda tashkilotlarning faoliyatini muvofiqlashtirish va hamkorligini ta’minlashga mas’ul bo‘lgan tuzilmalar o‘z faoliyatini boshlamoqda.

Jumladan, kuni kecha Guliston shahrida Sirdaryo viloyati Korrupsiyaga qarshi kurashish hududiy kengashining ta’sis yig‘ilishi bo‘lib o‘tdi.

Yig‘ilishda viloyat Korrupsiyaga qarshi kurashish hududiy Kengash a’zolari, ommaviy axborot vositalari vakillari, shuningdek O‘zbekiston Respublikasi Oliy Majlis Senati qo‘mita raisi Narimon Umarov, Korrupsiyaga qarshi kurashish agentligi direktorining o‘rinbosari –Tal’atjon Xaydarov hamda Sog‘liqni saqlash vaziri o‘rinbosari Abdulla Azizov ishtirok etdi.

Yig‘ilishda so‘zga chiqqanlar korrupsiyaga qarshi kurashish yo‘nalishida amalga oshirilayotgan chora-tadbirlar va ular ijrosida hududiy kengashlarning o‘rni, mazkur kengashlarning amaldagi qonunchilikdagi bo‘shliqlarni aniqlash va ularni bartaraf etish bo‘yicha takliflar taqdim etish mexanizmlari hamda ularning oldida turgan dolzarb vazifalar to‘g‘risida ma’lumot berishdi.

Yoshlarni ushbu illatning salbiy jihatlari to‘g‘risida xabardorligini oshirish, ochiqlik va shaffoflikni ta’minlash, fuqarolarga ko‘rsatilayotgan davlat xizmatlarini optimallashtirish va ortiqcha hujjatbozliklarni cheklash kabi yo‘nalishlarda Kengash a’zolarining vazifalari belgilab berildi.