Korrupsiyaga qarshi kurashish jarayonlarida davlat idoralari, fuqarolik jamiyati institutlari va keng aholi vakillarining ishtiroki muhim hisoblanadi. Ushbu institutlardan hududlar miqyosida foydalanish ham bu boradagi ishlar samaradorligini oshirishi tabiiy. Shu maqsadda barcha hududlarda Korrupsiyaga qarshi kurashish hududiy kengashining ta’sis majlisi tashkil etilmoqda.

Xususan, joriy yilning 14 oktabr kuni Termiz shahrida Surxondaryo viloyati Korrupsiyaga qarshi kurashish hududiy kengashining ta’sis majlisi bo‘lib o‘tdi.

Yig‘ilishda xalq deputatlari Surxondaryo viloyati Kengashi raisi, Korrupsiyaga qarshi kurashish hududiy kengashi raisi To‘ra Bobolov,  Korrupsiyaga qarshi kurashish agentligi direktori o‘rinbosari Umida Tuxtasheva, O‘zbekiston Respublikasi Davlat soliq qo‘mitasi raisi o‘rinbosari Mirziyod Maxkamov, Adliya vazirligining vakillari hamda hududiy kengashning a’zolari ishtirok etishdi.

Unda korrupsiyaga qarshi kurashish yo‘nalishida amalga oshirilayotgan chora-tadbirlar va hududiy kengashlarning o‘rni, budjet va investitsiya mablag‘larining samarali sarflanishi va davlat xaridlari jarayonlarida ularning ishtiroki to‘g‘risida ma’lumotlar berildi.

Yig‘ilish yakunida hududda korrupsiyaga qarshi kurashish jarayonlarini bartaraf etish, aholi orasida tushuntirish ishlarini olib borish, viloyatda mavjud muammolar yechimi yuzasidan takliflar taqdim etish bo‘yicha hududiy kengash a’zolarining vazifalari belgilab berildi.