Joriy yilning 15 oktabr kuni Qashqadaryo viloyati Korrupsiyaga qarshi kurashish hududiy kengashining ta’sis majlisi bo‘lib o‘tdi.

Majlisda Korrupsiyaga qarshi kurashish agentligi, Ichki ishlar vazirligi, Davlat statistika qo‘mitasi, "Taraqqiyot strategiyasi" markazi rahbariyati, hududiy kengash a’zolari va ommaviy axborot vositalari vakillari ishtirok etishdi.

Yig‘ilishda korrupsion holatlarning oldini olishda keng jamoatchilikning o‘rni muhim ekanligi ta’kidlandi. Shu kabi vazifalarni kompleks va tizimli ravishda tashkillashtirishda Korrupsiyaga qarshi kurashish hududiy kengashlaridan alohida faollik talab etilib, yuklatilgan vazifalar hamda vakolatlarga to‘xtalib o‘tildi.  

Majlisda Kengash a’zolarining vazifalarini aniq belgilash, hududda "Korrupsiyasiz soha" loyihalarining qamrovini kengaytirish, tuman, shaharlar darajasida ham mansabdorlar eshituvini tashkil etish, hududning korrupsiyaga qarshi kurashish siyosatini o‘zida aks ettirgan dastur ishlab chiqish kabi yo‘nalishlarda tegishli vazifalar belgilab olindi.

Shu bilan birga, milliy kengashning hududlar uchun masul bo‘lgan a'zolari ko‘magida hududiy kengashlar o‘rtasida ishlarni samarali tashkil etish va korrupsiyaning oldini olishda ta’sirchan  jamoatchilik nazorati va so‘rovini tashkillashtirish yuzasidan choralar belgilandi.