Joriy yilning 8-fevral kuni Korrupsiyaga qarshi kurashish agentligi direktori A.Burxanov Prezident Administratsiyasi masʼul xodimlari hamda Davlat bojxona qoʻmitasi rahbariyati bilan birga bojxona tizimida korrupsiyaning oldini olishga qaratilgan ishlar samaradorligini oʻrganish maqsadida Toshkent shahar bojxona boshqarmasining “Toshkent-tovar” tashqi iqtisodiy faoliyat bojxona postiga tashrif buyurdi.

Tashrif davomida bojxona tartib-taomillarini amalga oshirishda yuzaga kelishi mumkin boʻlgan korrupsion xavf-xatarlar hamda ularni minimallashtirishga qaratilgan chora-tadbirlarga eʼtibor qaratildi. Xususan, bojxona rasmiylashtiruvi jarayonida raqamlashtirish hamda sohaga joriy qilingan axborot texnologiyalarining imkoniyatlari oʻrganildi.

Oʻz navbatida, bu borada inson omilini kamaytirish hisobiga bojxona rasmiylashtiruvini soddalashtirishga qaratilgan chora-tadbirlar, tashqi iqtisodiy faoliyat subyektlari tomonidan tovarlarning bojxona hududiga olib kirilishi bilan bogʻliq tartib-taomillar uchun sarflanadigan vaqt va xarajatlar, byurokratiyani qisqartirish boʻyicha bir qator taklif va tavsiyalar ilgari surilib, ularni bojxona tizimini korrupsiyadan xoli tizimga aylantirish dasturi loyihasida nazarda tutish belgilandi.

Korrupsiyaga qarshi kurashish agentligi 

Axborot xizmati