Korrupsiyaga qarshi kurashish boʻyicha belgilangan vazifa va topshiriqlar ijrosining barcha sohalar va hududlarda birdek taʼminlanishi islohotlar natijadorligiga toʻgʻridan-toʻgʻri taʼsir qiluvchi asosiy jihat sanaladi.

Joriy yilning 9-fevral kuni Korrupsiyaga qarshi kurashish agentligi va boshqa manfaatdor vazirlik, idora vakillaridan iborat ishchi guruh tomonidan Sirdaryo viloyatida bu boradagi ishlarning tashkil etilishi holati joyiga chiqqan holda oʻrganildi.

Oʻrganishlar davomida mahalliy hokimliklarda korrupsiyaga qarshi ichki nazorat tuzilmalari faoliyatining yoʻlga qoʻyilganligi, shuningdek, maktabgacha taʼlim muassasalari va mahalliy davlat idoralarida korrupsiyaga qarshi kurashish faoliyati hamda ularning ochiqligini taʼminlash borasidagi ishlar, hududda sohaga oid targʻibot-tashviqot tadbirlarining yoʻlga qoʻyilganligi holatlariga eʼtibor qaratildi.

Dastlab ishchi guruh aʼzolari viloyatdagi maktabgacha taʼlim muassasalarida boʻlib, ushbu muassasalarda bolalarning maktabgacha taʼlim tashkilotiga qabul qilinishi va qatnovi, sogʻlom ovqatlantirish tizimining tashkil etilishi holati oʻrganildi.

Shu bilan birga, maktabgacha taʼlim muassasalari xodimlari bilan ochiq muloqotlar oʻtkazildi.

Mahalliy aholi vakillari tizimda bolalarni qabul qilish jarayonlarining raqamlashtirilgani, bu esa korrupsiyaviy holatlarning oldini olishga xizmat qilayotganini alohida eʼtirof etishdi. Shuningdek, taʼlim muassasalariga ishga qabul qilish jarayonlari shaffofligini, bolalarning ovqatlanishi hamda ularning aqliy faoliyatlarini rivojlantirish boʻyicha ishlar samaradorligini yanada oshirish boʻyicha fikr-mulohaza va takliflarini bildirishdi.

Ishchi guruh a’zolari tomonidan viloyat hokimligi tizimida ham bir qator masalalar ko‘rib chiqildi. Jumladan, korrupsiyaga qarshi ichki nazorat tizimini tashkil etish va samaradorligini oshirish yuzasidan tegishli tavsiyalar berildi.

Bundan tashqari, viloyatdagi masʼul xodimlar uchun ochiqlikka oid qonunchilik hujjatlari ijrosini samarali amalga oshirish yuzasidan tushuntirish hamda targʻibot uchrashuvi ham tashkil etildi.

Aytish joizki, Agentlik tomonidan oʻtkaziladigan bu kabi oʻrganishlar va targʻibot tadbirlarini boshqa hududlarda ham tizimli ravishda tashkil etish rejalashtirilgan.

Sirdaryo viloyatida oʻtkazilgan oʻrganish natijalariga oid toʻliq tafsilotlarni  Internet tarmogʻidagi rasmiy sahifalarimiz orqali berib boramiz.

Korrupsiyaga qarshi kurashish agentligi

Axborot xizmati