O‘zbekiston Respublikasi Prezidentining 2021 yil 6 iyuldagi “Korrupsiyaga qarshi kurashish faoliyatini samarali tashkil etishga doir qo‘shimcha chora-tadbirlar to‘g‘risida”gi PQ–5177-son qaroriga asosan Korrupsiyaga qarshi kurashish agentligi, Adliya vazirligi, Davlat boshqaruvi akademiyasi va Bosh prokuratura Akademiyasi tomonidan davlat xizmatchilarini korrupsiyaga qarshi kurashish, manfaatlar to‘qnashuvi va odob-axloq qoidalari bo‘yicha o‘quv kurslarida muntazam ravishda o‘qitish tizimini yaratish to‘g‘risida kelishuv imzolandi.

Unga muvofiq,  o‘quv kurslari “halollik vaksinasi” tamoyili asosida mazkur davlat organlari va tashkilotlarining mutaxacsis xodimlari, o‘qituvchi va trenerlari tomonidan amalga oshiriladi.

O‘quv kurslari bazaviy va maxsus chuqurlashtirilgan kurslardan iborat bo‘lib, davlat xizmatchilari uchun ba’zaviy maxsus malaka oshirish kurslari 12 soatdan, maxsus chuqurlashtirilgan o‘quv kurslari esa 50 soatdan kam bo‘lmagan hajmda tashkil etiladi. 

Bazaviy o‘quv kurslar:
➖davlat organlari o‘zlarining xodimlari uchun idoraviy ta’lim muassasalari;
➖davlat organlarining tuman (shahar) bo‘linmalarida faoliyat yuritayotgan davlat xizmatchilari uchun O‘zbekiston Respublikasi Adliya vazirligi qoshidagi Yuristlar malakasini oshirish markazi;
➖davlat organlarining Qoraqalpog‘iston Respublikasi, viloyatlar va Toshkent shahardagi bo‘linmalaridagi davlat xizmatchilari uchun hududiy oliy ta’lim muasasalari;
➖davlat organlarining markaziy apparatidagi davlat xizmatchilari uchun Davlat boshqaruvi akademiyasi va uning filiallari tomonidan tashkillashtiriladi.

Maxsus chuqurlashtirilgan o‘quv kurslar Davlat boshqaruvi akademiyasi va Bosh prokuratura Akademiyasida tashkil etilib, ularda ishtirok etish ish beruvchi va ta’lim muassasasi o‘rtasida tuzilgan shartnoma asosida amalga oshiriladi. 

Bazaviy va maxsus chuqurlashtirilgan o‘quv kurslarning namunaviy o‘quv dasturi Davlat boshqaruvi akademiyasi, Bosh prokuratura Akademiyasi hamda Yuristlar malakasini oshirish markazi tomonidan har yili ishlab chiqiladi va ularning rasmiy veb-saytlarida e’lon qilib boriladi.

Davlat boshqaruvi akademiyasi, Bosh prokuratura Akademiyasi hamda Yuristlar malakasini oshirish markazi tomonidan davlat xizmatchilariga bazaviy va maxsus chuqurlashtirilgan o‘quv kurslarda ishtirok etganlik uchun tegishli shakldagi sertifikatlar taqdim etiladi.

Korrupsiyaga qarshi kurashish agentligi davlat xizmatchilarini korrupsiyaga qarshi kurashish, manfaatlar to‘qnashuvi va odob-axloq qoidalari bo‘yicha o‘quv kurslarida muntazam o‘qitilishi yuzasidan monitoring olib boradi hamda vazirlik va idoralarga bu borada amaliy yordam ko‘rsatadi. 

Korrupsiyaga qarshi kurashish agentligi 
Axborot xizmati