Joriy yilning 22-fevral kuni Yevropada xavfsizlik va hamkorlik tashkiloti (EXHT) koʻmagida Xalqaro ochiq maʼlumotlar xartiyasi tomonidan ishlab chiqilgan Oʻzbekistonda korrupsiyaga qarshi kurash boʻyicha tuzilgan ochiq maʼlumotlar toʻplami yuzasidan Yakuniy hisobotning taqdimotiga bagʻishlangan seminar boʻlib oʻtdi.

Maʼlumot uchun: Oʻzbekiston Xalqaro ochiq maʼlumotlar xartiyasiga qoʻshilgan jahondagi 23-mamlakat boʻlib, Xartiya 150 dan ortiq hukumat va tashkilotlarning maʼlumotlarini xalqaro miqyosda ochiqligi va shaffofligini taʼminlash ustida ish olib boradi. Agentlik Xartiya bilan ushbu hisobotni ishlab chiqishda va 2021-yil 3-dekabrda oʻtkazilgan “Ochiqlik forumi” doirasida yaqin hamkorlik olib bordi.

Taqdimot Xalqaro ochiq maʼlumotlar xartiyasining Boshqaruvchi direktori N.Karfi va Yevropada xavfsizlik va hamkorlik tashkilotining xorijiy ekspertlari tomonidan oʻtkazildi. Tadbirda Oʻzbekiston tomonidan 30 ga yaqin vazirlik va idoralar xodimlari ishtirok etdi.

Ekspertlar Oʻzbekistonda korrupsiyaga qarshi kurash boʻyicha maʼlumotlarning hozirgi holati, ochiq maʼlumotlardan foydalanish imkoniyatlarini kengaytirish masalalari va ularning korrupsiyaga qarshi kurashishda foydalanish imkoniyatlarini muhokama qilishdi.

Bundan tashqari, tadbir davomida ochiq maʼlumotlarning mavjudligi, ularning foydalanuvchilar tomonidan qayta foydalanish imkoniyatlariga va tizimlarning oʻzaro bogʻliqligini taʼminlashga alohida eʼtibor qaratildi, bu esa keyinchalik manfaatdor tomonlar tomonidan ochiq maʼlumotlardan amaliy vosita sifatida foydalanish imkonini berishi taʼkidlab oʻtildi. Shuningdek, hukumat faoliyatining shaffofligini taʼminlash, axborot erkinligi, davlat xizmatchilarining oylik maoshlari toʻgʻrisida maʼlumotlarni eʼlon qilish, davlat organlari va tashkilotlarning hisobdorligi va ichki audit jarayonlarini muvofiqlashtirish, shaffoflikni baholash masalalari va bu boradagi metodologiyalar boʻyicha fikr almashildi.

Tadbir yakunida ekspertlar tomonidan ochiq maʼlumotlardan foydalanishni yaxshilash boʻyicha amaliy takliflar ilgari surildi, jumladan, xalqaro standartlarga asosan korrupsiyaga qarshi maʼlumotlar infratuzilmasini yaratish uchun ustuvor yoʻnalishlar, texnik va me’yoriy tavsiyalar hamda maʼlumotlarni boshqarish boʻyicha takliflar ilgari surildi.

Korrupsiyaga qarshi kurashish agentligi

Axborot xizmati