Avval xabar berganimizdek, Agentlik tomonidan respublikamiz hududlarida “Davlat organlari va tashkilotlari faoliyati ochiqligini taʼminlash” mavzusida seminar oʻtkazib kelinmoqda. 

Mazkur seminar mamlakat Prezidentining “Davlat organlari va tashkilotlarining faoliyati ochiqligini taʼminlash, shuningdek, jamoatchilik nazoratini samarali amalga oshirishga doir qoʻshimcha chora-tadbirlar toʻgʻrisida”gi Farmoni  bilan tasdiqlangan Ochiq maʼlumotlar sifatida joylashtirilishi kerak boʻlgan ijtimoiy ahamiyatga molik maʼlumotlarning oʻz vaqtida va toʻliq  eʼlon qilib borilishini taʼminlash maqsadida tashkil etilmoqda. 

Shu kunga qadar oʻquv seminarlari Korrupsiyaga qarshi kurashish agentligi masʼul xodimlari ishtirokida Toshkent shahri, Fargʻona, Sirdaryo, Jizzax hamda Toshkent viloyatlarida oʻtkazildi. 

Navbatdagi seminarlar kuni-kecha Navoiy va Qashqadaryo, bugun esa Surxondaryo va Buxoro viloyatlarida boʻlib oʻtdi. Unda Oliy Majlis Senatining Axborot siyosati va davlat organlarida ochiqlikni taʼminlash masalalari qoʻmitasi, Davlat statistika qoʻmitasi vakillari, shuningdek, mahalliy deputatlar hamda Kengashlar huzurida tashkil etilgan Axborot siyosati va mahalliy davlat organlarida ochiqlikni taʼminlash masalalari boʻyicha doimiy komissiya aʼzolari hamda faoliyat ochiqligini taʼminlash uchun masʼul boʻlgan mutaxassislar ishtirok etdi.

Seminarda  Oʻzbekiston Respublikasining “Davlat hokimiyati va boshqaruvi organlari faoliyatining ochiqligi toʻgʻrisida”gi Qonuni hamda mamlakatimiz Prezidentining “Davlat organlari va tashkilotlarining ochiqligini taʼminlash, shuningdek, jamoatchilik nazoratini samarali amalga oshirishga doir qoʻshimcha chora-tadbirlar toʻgʻrisida”gi Farmoni ijrosi boʻyicha mahalliy davlat hokimiyati va boshqaruv organlari faoliyati atroflicha muhokama qilindi.

Taʼkidlanganidek, ochiqlikni taʼminlash sohasida Agentlik olib borilayotgan oʻrganishlar davlat organlari va tashkilotlari tomonidan mazkur Farmon talablarini toʻliq, oʻz vaqtida va sifatli ijro etilishida qator xato va kamchiliklarga yoʻl qoʻyilayotganini koʻrsatmoqda.  

Jumladan, Agentlik tomonidan 2021-yil 1-dekabrdan 2022-yil 10-yanvarga qadar boʻlgan davrda Qoraqalpogʻiston Respublikasi Joʻqorgʻi Kengesi, xalq deputatlari viloyat, Toshkent shahar, tuman va shahar Kengashlari sessiyalarining toʻgʻridan-toʻgʻri jonli efirga uzatilishi holati boʻyicha oʻtkazilgan monitoringda eng qoniqarsiz koʻrsatkich Buxoro viloyatida qayd etilgan, xususan, viloyatda xalq deputatlari viloyat, tuman, shahar Kengashlari tomonidan oʻtkazilgan jami sessiyalarning 81 foizi jonli translyatsiya qilinmagan.

Bundan tashqari, oʻtkazilgan masofaviy monitoring natijalariga koʻra, Buxoro viloyatida mavjud 11 ta tuman va shahar hokimliklarining 10 tasi Internet tarmogʻida rasmiy veb-sayt tashkil etilgan. Biroq ularda Farmonda belgilangan ochiq maʼlumotlar umuman joylashtirilmagan. 

Navoiy viloyatida esa jami 11 ta tuman va shahar hokimliklaridan atiga  2 tasi Internet tarmogʻida rasmiy veb-saytiga ega, ushbu saytlarda ham Farmon bilan tasdiqlangan ochiq maʼlumotlar mavjud emas.
 Qolgan 9 ta tuman va shahar hokimliklarining “uz” domeni bilan ochilgan rasmiy veb-sayti oʻrganish kuni (09.03.2022 y.) holatiga ishchi holatida emasligi maʼlum boʻldi.

Shu bois seminarda  Agentlik masʼul xodimlari ishtirokchilar eʼtiborini Ochiq maʼlumotlar sifatida joylashtirilishi kerak boʻlgan ijtimoiy ahamiyatga molik maʼlumotlar roʻyxatida koʻrsatilgan axborotlar toʻplamining joylashtirib borilishi, shuningdek, ochiq axborot turi, joylashtiriladigan resursi, taqdim etish va yangilash muddati hamda ularni joylashtirish tartibi kabi muhim masalalarga qaratdi.

 Muloqotlar davomida davlat organlari va tashkilotlari faoliyatining ochiqligini taʼminlashda yuzaga kelayotgan muammolar ham muhokama etilib, ularni bartaraf etish chora-tadbirlari belgilab olindi.

Korrupsiyaga qarshi kurashish agentligi
Axborot xizmati