Korrupsiyaga qarshi kurashish agentligi tomonidan Oʻzbekiston Respublikasi Prezidentining 2020-yil 29-iyundagi PF-6013-son Farmoni bilan belgilab berilgan vazifalardan kelib chiqib, sudlar tomonidan korrupsion jinoyatlar sodir etgan shaxslarga nisbatan muayyan huquqdan mahrum qilish jazosini qoʻllash amaliyoti oʻrganilib, tahlil qilindi.

Maʼlumot uchun: muayyan huquqdan mahrum qilish bu  — jinoyat sodir etishda aybli deb topilgan shaxsning maʼlum vaqt davomida u yoki bu lavozimda ishlashini taʼqiqlashdan iborat boʻlgan jinoiy-huquqiy taʼsir chorasi hisoblanadi. 

Qayd etish lozimki, muayyan huquqdan mahrum qilish shu shaxs tomonidan (shuningdek, boshqa shaxslar tomonidan) bu kabi jinoyatlar sodir etilishining oldini olishda samarali vositalardan biridir.

Tahlillarga koʻra, sudlar tomonidan korrupsion (Jinoyat kodeksining 167-moddasi, 168-moddasi 3-qismi, 205-214-moddalari bilan bogʻliq) jinoyatlar boʻyicha 2019-yilda 5 565 nafar shaxsga nisbatan 3 576 ta, 2020-yilda 4 159 nafar shaxsga nisbatan 2 834 ta, 2021-yilning 9 oyida esa 6 197 nafar shaxsga nisbatan 3 722 ta jinoyat ishlari koʻrilgan.  

Biroq, 2019-yilda koʻrilgan ishlar boʻyicha ayblov hukmi chiqarilgan 4 741 nafar shaxsdan 2 574 nafari (yoki 54  foizi)ga, 2020-yilda 3 394 nafar shaxsdan 1 740 nafari (yoki 51 foizi)ga, 2021-yilning 9 oyida 4 572 nafar shaxsdan  2 131 nafari (yoki 47 foizi)ga nisbatan muayyan huquqdan mahrum qilish jazolari tayinlangan.

Yaʼni, korrupsion jinoyatlar sodir etganligi uchun sudlangan shaxslarga nisbatan muayyan huquqdan mahrum qilish jazosini qoʻllash amaliyoti yildan-yilga kamayib borgan. 

Korrupsion jinoyatlar sodir etib, Jinoyat kodeksining 70, 71-moddalariga asosan jazodan ozod qilingan shaxslar 2019-yilda 386 nafarni, 2020-yilda 362 nafarni, 2021-yilning 9 oyida esa 492 nafarni tashkil etgan.

Tahlillar natijasidan maʼlum boʻldiki, muayyan huquqdan mahrum qilish jazosini qoʻllash amaliyoti kamayib borayotganligi korrupsion jinoyatlar soni ortib borishining sabablaridan biri boʻlmoqda. 

Shu bois Agentlik tomonidan mazkur sohada qonunchilikni takomillashtirish va  korrupsion jinoyatlarni kamaytirishga qaratilgan oʻzgartirishlar kiritish haqida takliflar ishlab chiqilmoqda.

Korrupsiyaga qarshi kurashish agentligi

Axborot xizmati