Korrupsiyaga qarshi kurashish agentligida  davlat xaridlarini tashkil etishda korrupsion xavf-xatarlarni aniqlash va ularning barvaqt oldini olish maqsadida Moliya vazirligi, Oʻzbekiston Tovar-xom ashyo birjasi va “XT-Xarid Texnologiyalari” qoʻshma korxonasi (maxsus axborot portali operatorlari) masʼul xodimlari ishtirokida yigʻilish oʻtkazildi.

Yigʻilishda davlat xaridlari sohasida jamoatchilik nazoratini kuchaytirish, ochiqlik va shaffoflikni taʼminlash borasida amalga oshirilayotgan ishlar tahlil qilindi.

Shuningdek, tizimda mavjud muammolar va ularni bartaraf etish choralari xususida alohida toʻxtalib oʻtildi.

Taʼkidlanishicha,  hozirda xarid hujjatlarida ishtirokchilarga qoʻyilgan kvalifikatsiya va texnik talablarni bitta yetkazib beruvchiga moslashtirish holatlarining oldini olish lozim. 

Buyurtmachi, tender komissiyasi aʼzolari va ishtirokchilarning  oʻzaro affillanganligini aniqlash,  shartnomalar bajarilishini monitoring qilish hamda davlat xaridlari elektron tizimida tovarlar narxlari boʻyicha tahliliy maʼlumotlarni yuritish ham muhim sanaladi. 

Shuningdek,  davlat xaridlari tizimida korrupsion xavf-xatarlarning oldini olish uchun ishtirokchilar reytingini yuritish mexanizmlarini joriy etish zarurligi qayd etildi. 

Muloqot davomida elektron xaridlarni amalga oshirishda buyurtmachilarning  bilim va malakasini oshirish masalasi ham muhokama etildi. 

Yigʻilish yakunida mavjud muammolarni qisqa fursatlarda bartaraf etish yuzasidan tegishli chora-tadbirlar belgilandi.

Korrupsiyaga qarshi kurashish agentligi

Axborot xizmati