Joriy yilning 26-aprel kuni Agentlik rahbariyati Yevropa Ittifoqi delegatsiyasi vakillari Fransua Bejo, Alessandro Liamine hamda Zofiya Lyutkevichni qabul qildi.

Uchrashuvdan koʻzlangan asosiy maqsad Yevropa Ittifoqi bilan hamkorlikda “Oʻzbekistonda korrupsiyaga qarshi muhitni mustahkamlashga koʻmaklashish” loyihasini atroflicha muhokama qilishdan iborat boʻldi.

Muloqot davomida  korrupsiyaga qarshi kurashishda Agentlik tomonidan amalga oshirilishi rejalashtirilayotgan va amalga oshirilayotgan loyihalarda milliy va xalqaro hamkorlarning metodik, texnik va ekspertlik koʻmagi muhim ahamiyatga ega ekani alohida taʼkidlandi. 

 
Shunga koʻra, tomonlar mazkur loyiha doirasida amalga oshiriladigan maqsad va vazifalar yuzasidan oʻzaro fikr almashdilar. 

Xususan, Oʻzbekistonning korrupsiyaga qarshi kurashish tizimini va korrupsiyaga qarshi kurashish organlarining institutsional salohiyatini takomillashtirish, Agentlikning jamoatchilik va ommaviy axborot vositalari bilan aloqalar sohasida salohiyatini kuchaytirish boʻyicha aniq taklif va mulohazalar oʻrtaga tashlandi. 

Shuningdek, uchrashuvda Agentlik tomonidan Virtual Akademiyani tashkil etishda texnik koʻmak koʻrsatish, Oʻzbekistonda Korrupsiyaga qarshi kurashish Mintaqaviy markaz (Xab) faoliyatini yoʻlga qoʻyishda yaqindan hamkorlik qilish takliflari ilgari surildi.

Muloqotlar mobaynida Yevropa Ittifoqi delegatsiyasi vakillari tomonidan korrupsiyaga qarshi kurashish boʻyicha birgalikdagi saʼy-harakatlarni amalga oshirishda oʻzaro hamkorlikning yangi yoʻnalishlarida ham  amaliy yordam koʻrsatilishi maʼlum qilindi.

Uchrashuv soʻnggida tomonlar oʻzaro samarali hamkorlikni davom ettirishga umid bildirdilar.

Korrupsiyaga qarshi kurashish agentligi

Axborot xizmati