AQShda boʻlib turgan Oʻzbekiston delegatsiyasi joriy yilning 26-aprel kuni AQSH Davlat Departamenti Xalqaro narkotik moddalar va huquqni muhofaza qilish ishlari byurosi (INL) vakillari bilan muzokaralar oʻtkazdi.

Maʼlumot uchun: Xalqaro giyohvand moddalar va huquqni muhofaza qilish ishlari byurosi (INL) mamlakatlarga yordam koʻrsatish uchun joylarda hukumatlar va fuqarolarning jamiyatda ochiqlik, masʼuliyat va halollikni  oshirishga koʻmaklashish, shuningdek,  korrupsiyaning oldini olish boʻyicha amaliy chora-tadbirlar ishlab chiqish boʻyicha ish olib boradi. 
Tadbirda Oʻzbekiston tomonidan ikki tomonlama hamkorlik  dinamikasi va Korrupsiyaga qarshi kurashish agentligi bilan oʻzaro hamkorlik koʻlamini kengaytirishga qaratilgan  bir qator tashabbuslar ilgari surildi.

Jumladan, Agentlik xodimlari va davlat xizmatchilarining malakasi va salohiyatini oshirish maqsadida korrupsiyaga qarshi kurashish boʻyicha maxsus oʻquv kurslari, treninglarni tashkil etish hamda doimiy ekspert yordami koʻrsatish,  qoʻshma tadbirlar va loyihalarni amalga oshirish yuzasidan fikr almashildi.

Uchrashuvda oʻzaro hamkorlik aloqalarini  yangi bosqichga olib chiqish maqsadida Agentlik va  Xalqaro narkotik moddalar va huquqni muhofaza qilish ishlari byurosi oʻrtasida Qoʻshma harakatlar rejasini ishlab chiqishga kelishildi.

Shu kuni delegatsiya aʼzolari Davlat departamentining Demokratiya, inson huquqlari va mehnat byurosi vakillari bilan ham uchrashdi. 

Maʼlumot uchun: AQSH Davlat departamenti Oʻzbekistonda inson huquqlariga rioya etilishi toʻgʻrisidagi hisobotini eʼlon qilgan boʻlib,  Demokratiya, inson huquqlari va mehnat byurosi ushbu hisobotni tayyorlashga masʼul tuzilma hisoblanadi.

Jumladan, hisobotda mamlakatimizda Korrupsiyaga qarshi kurashish agentligi va Korrupsiyaga qarshi kurash boʻyicha Milliy kengashning tashkil etilishi, shuningdek, davlat xizmatlarini koʻrsatish sohasidagi islohotlar natijasida turli byurokratik toʻsiqlar va mayda korrupsiya darajasini pasaytirishga muvaffaq boʻlingani qayd etilgan.

Shuningdek, 2021-yilda hukumat sobiq korrupsionerlarning davlat organlariga qayta ishga kirishiga yoʻl qoʻymaslik maqsadida korrupsiya jinoyatlarini sodir etgan shaxslar elektron reyestrini yaratishga kirishgani taʼkidlangan.

Tadbirda ikki tomon vakillari korrupsiyaga qarshi kurashish va uning oldini olish hamda sohani yanada isloh qilish yuzasidan oʻzaro fikr almashishdi.

Korrupsiyaga qarshi kurashish agentligi

Axborot xizmati