Korrupsiyaga qarshi kurashish agentligi va Farg‘ona viloyati hokimligi tomonidan “Ochiq, shaffof va hisobdor hudud” loyihasini amalga oshirish bo‘yicha 2022-2023 yillarga mo‘ljallangan “Yo‘l xaritasi” tasdiqlandi.

Xabaringiz bor, joriy yilning fevral oyida Farg‘ona shahrida viloyat va Agentlik rahbariyati ishtirokida davlat organlari va tashkilotlari faoliyati ochiqligini ta’minlash bo‘yicha ishlarni yanada takomillashtirishga bag‘ishlangan uchrashuv bo‘lib o‘tgan edi.

Unda Farg‘ona viloyatida “Ochiq, shaffof va hisobdor hudud” loyihasini amalga oshirishga kelishib olinib, rejalashtirilgan dastlabki chora-tadbirlar mahalliy deputatlar, OAV vakillari ishtirokida ochiq muhokama qilindi.

Natijada, mas’ullar tomonidan Farg‘ona viloyatida ochiqlikka oid qonunchilik hujjatlariga rioya etilishi, mahalliy hokimliklar va vazirlik va idoralarning hududiy boshqarmalarining jamoatchilik oldida shaffof va hisobdor bo‘lishiga qaratilgan “Yo‘l xaritasi” loyihasi ishlab chiqildi.

Shuningdek, hujjat loyihasi viloyat hokimligining rasmiy veb-saytida jamoatchilik muhokmasi uchun joylashtirilib, fuqarolar tomonidan bildirilgan fikr va takliflar asosida yanada takomillashtirildi.

Endilikda, tasdiqlangan “Yo‘l xaritasi”ga muvofiq, Farg‘ona viloyatida Agentlik, mahalliy deputatlar tomonidan faoliyat ochiqligini ta’minlash sohasida amalga oshirilgan ishlar yuzasidan jamoatchilik eshituvlari, fuqarolar o‘rtasida davlat organlari va tashkilotlari faoliyatini ochiqligini baholashga qaratilgan jamoatchilik fikri so‘rovlari o‘tkaziladi.

Bundan tashqari, xalq deputatlari viloyat Kengashida tashkil etilgan Axborot siyosati va mahalliy davlat organlarida ochiqlikni ta’minlash masalalari bo‘yicha doimiy komissiyasi tomonidan viloyat, tuman (shahar) hokimliklarida hamda vazirlik va idoralarning hududiy boshqarmalarida korrupsiyaning oldini olish va unga qarshi kurashish borasida amalga oshirilayotgan ishlar samaradorligini va ularning faoliyati ochiqligini doimiy baholab borish vazifalari belgilangan.

Misol uchun, viloyat, tuman, shahar Kengashlari sessiyalarini Internet tarmog‘i va mahalliy telekanallar orqali jonli efirga uzatilishi ustidan doimiy nazorat o‘rnatish, viloyat hokimligi rasmiy veb-sayti va ijtimoiy tarmoqlardagi sahifalarini ochiqlikka oid qonunchilik hujjatlari talablari asosida takomillashtirish, sinov tariqasida tuman (shahar) hokimligida “Ochiq va shaffof hokimiyat” loyihasini amalga oshirish vazifalari ham shular jumlasidandir.

Korrupsiyaga qarshi kurashish agentligi

Axborot xizmati