Joriy yilning 12-may kuni mamlakatimizga Malayziya delegatsiyasi tashrif buyurdi.Tashrifning asosiy maqsadi korrupsiyaga qarshi kurashish sohasida oʻzaro tajriba almashish hamda ikki tomonlama hamkorlikni rivojlantirishdan iborat. 

Tashrif doirasida  Korrupsiyaga qarshi kurashish agentligida  uchrashuv oʻtkazildi. 

Muloqotlar davomida tomonlar har ikki davlatning korrupsiyaga qarshi kurashish siyosatidagi tendensiyalar yuzasidan maʼlumot almashdilar. Xususan, Agentlik tomonidan 2022 — 2026-yillarga moʻljallangan Yangi Oʻzbekistonning taraqqiyot strategiyasi va uni amalga oshirishga oid davlat dasturi, qolaversa, bu borada qabul qilingan soʻnggi me’yoriy hujjatlar bilan tanishtirib oʻtildi. 

Akmal Burxanov, 
Korrupsiyaga qarshi kurashish agentligi direktori:

— Oʻzbekiston BMTning Xalqaro korrupsiyaga qarshi konvensiyaning toʻlaqonli aʼzosi sifatida  korrupsiyaga qarshi kurash boʻyicha davlat siyosati darajasida muhim islohotlarni amalga oshirishni boshlab yubordi. Korrupsiyaga qarshi kurashishga masʼul alohida tuzilma  tashkil etilganining oʻziyoq mamlakatimizda korrupsiyaga qarshi kurashish haqiqatan ham jiddiy tus olganligini isbotlaydi.  

Eng muhimi, soʻnggi uch yilda korrupsiyaning oldini olish va uni bataraf etishga qaratilgan yangilanish va oʻzgarishlar samarasida bir qator ijobiy natijalarga erishildi. Xususan, Oʻzbekistonning  korrupsiyaga qarshi kurashish sohasida xalqaro reytinglardagi oʻrni sezilarli darajada yaxshilandi. 

Lekin amalga oshirilishi lozim boʻlgan maqsad va vazifalar hali juda koʻp, albatta. Ayniqsa, sohadagi xalqaro standartlarni milliy qonunchilikka implementatsiya qilish zarur va bunda bizga ijobiy natija koʻrsata olgan xalqaro amaliyot har tomonlama muhim. 

Bu borada Malayziya uzoq yillik boy va samarali tajriba ega ekanligi yaxshi maʼlum.  Shu bois  Malayziya Korrupsiyaga qarshi kurashish komissiyasi bilan oʻzaro yaqin hamkorlik  biz uchun alohida ahamiyatga ega.

Oʻz navbatida, malayziyalik hamkasblar oʻz mamlakatlarida korrupsiyaga qarshi kurashish boʻyicha koʻrilayotgan choralar, jumladan, bu boradagi milliy tajriba va uning yutuqlari haqidagi maʼlumotlar bilan oʻrtoqlashdilar. 

Tan Srи Azam bin Baki, Malayziya Korrupsiyaga qarshi kurashish komissiyasi bosh komissari (delegatsiya rahbari): 

— Biz bu uchrashuvni bir yildan buyon kutayotgan edik. Xususan, oʻtgan yilning oktyabr oyidan boshlab Agentlik vakillari bilan bir necha bor muzokaralar olib bordik va unda Agentlik bilan tajriba almashish, uning faoliyatiga faol koʻmaklashishga tayyor ekanimizni bildirdik. Ushbu tashrifimiz uzoq davom etadigan hamkorligimizning debochasidir.  

Bugun idoralararo Memorandum imzolaganimiz esa nafaqat idoralarimiz faoliyatida, balki Oʻzbekiston va Malayziya tarixida muhim voqea boʻlib qoladi, deb oʻylayman. 

Biz Agentlik bilan har tomonlama manfaatli munosabatlarni yoʻlga qoʻyishga tayyormiz. Xususan, tajriba almashish, oʻzaro faoliyatni takomillashtirish, kadrlar tayyorlash, axborot almashish, texnik koʻmak koʻrsatish kabi muhim yoʻnalishlarda hamkorlik qilish istagidamiz. 

Jumladan, Malayziyada Korrupsiyaga qarshi kurashish akademiyasi mavjud boʻlib, u yerda Agentlik bilan birgalikda kadrlarni tayyorlash boʻyicha oʻzaro hamkorlik qilmoqchimiz. Qolaversa, Oʻzbekistonda ham ana shunday Akademiya tashkil etilishiga texnik koʻmak koʻrsatishni maqsad qilganmiz.  

Hech qaysi davlat yoki davlat organi bir oʻzi korrupsiyaga qarshi kurashda yutib chiqolmaydi, bizning birgalikdagi, hamkorlikdagi harakatlarimiz shuning uchun ham muhim va dolzarbdir.

Uchrashuvning asosiy voqeasi ikki tomon oʻrtasida idoralararo Memorandumning imzolangani boʻldi. 

Mazkur memorandum kasbiy malaka oshirish kurslarini tashkil etish, tajriba almashish va kadrlar salohiyatini rivojlantirish, korrupsiyaning oldini olish va unga qarshi kurashish boʻyicha maʼlumot va professional materiallar almashinuvini yoʻlga qoʻyish, qoʻshma forumlar, seminarlar, treninglar va konferensiyalar oʻtkazish  kabi bir qator muhim yoʻnalishlarda oʻzaro hamkorlikni nazarda tutadi. 

Shuningdek, korrupsiyaning oldini olish va unga qarshi kurashishda jamoatchilik ishtirokini kuchaytirish maqsadida aholini korrupsiyaga qarshi oʻqitish, ularning ommaviy axborot vositalari va halollikni targʻib qiluvchi kampaniyalar haqida xabardorligini oshirish boʻyicha maʼlumot almashish yoʻlga qoʻyiladi. 

Davlat va xususiy sektorda samarali boshqaruv boʻyicha texnik maslahat berish yoki koʻmak koʻrsatish, shuningdek, korrupsiyaga qarshi siyosat va strategiyalarni ishlab chiqishda yordam berish masalalari ham memorandumning muhim yoʻnalishlari qatoridan joy olgan.

Malayziya delegatsiyasi vakillari ishtirokidagi tadbirlar joriy yilning 15-may sanasiga qadar davom etadi. Rasmiy sahifalarimiz orqali jarayonlarning muhim tafsilotlari bilan tanishtirib boramiz. 

Korrupsiyaga qarshi kurashish agentligi 
Axborot xizmati