Ayni daqiqalarda  Samarqand shahrida "Investision faoliyatda korrupsiya holatlarining oldini olish va unga qarshi kurashish" mavzusiga bag‘ishlangan birinchi mintaqaviy seminar bo‘lib o‘tmoqda.

Tadbir BMTning Giyohvand moddalar va jinoyatchilik bo‘yicha boshqarmasi bilan hamkorlikda "Ipak yo‘li Iqtisodiy Kamari bo‘ylab joylashgan davlatlarda BMTning Korrupsiyaga qarshi konvensiyasini amalga oshirilishini qo‘llab-quvvatlash orqali barqaror rivojlanishga ko‘maklashish"loyihasi doirasida  tashkil etildi. 

Ma'lumot uchun: Ushbu loyiha investisiya loyihalarida korrupsiyaning oldini olish va unga qarshi kurashish bo‘yicha xalqaro hamkorlikni rag‘batlantirish, xususan, axborot, ilg‘or tajriba va bilimlar almashinuvini kuchaytirish hamda tegishli davlatlarning salohiyatini mustahkamlash uchun korrupsiyaga qarshi amaliyotchi-ekspertlar tarmog‘ini yaratish va qo‘llab-quvvatlashga qaratilgan.

Tarmoq 2021 yil 11-12 dekabr' kunlari Sharm-El-Shayxda bo‘lib o‘tgan BMTning Korrupsiyaga qarshi Konvensiyasiga a'zo davlatlar konferensiyasining to‘qqizinchi sessiyasi doirasida rasman ishga tushirilgan edi. 

Bugungi kunga qadar tarmoqqa Albaniya, Armaniston, Ozarbayjon, Bosniya va Gersegovina, Xitoy, Gruziya, Gresiya, Eron, Qozog‘iston, Qirg‘iziston, Mongoliya, Chernogoriya, Serbiya, Tojikiston, Turkiya va O‘zbekiston kabi 16 ta davlat qo‘shilgan.

Seminar BMTning Giyohvand moddalar va jinoyatchilik bo‘yicha boshqarmasi ko‘magida Korrupsiyaga qarshi kurashish agentligi hamda Bosh prokuratura hamkorligida o‘tkazilmoqda. 

Mazkur nufuzli tadbirning asosiy maqsadi - ekspertlar tarmog‘ida ishtirok etuvchi mamlakatlarda investisiya faoliyati va investisiya siyosati sohasida korrupsiyaning oldini olish va unga qarshi kurashish bo‘yicha amaliy, asoslangan va istiqbolli yondashuvlarni muhokama qilishdan iborat. 

Seminar ishi korrupsiyaning oldini olish, shuningdek, investision loyihalarni tayyorlash va amalga oshirishda korrupsion huquqbuzarliklarni tekshirish (tergov qilish) masalalariga qaratilgan ikki mavzuni o‘z ichiga oladi.      

Har ikki mavzu doirasida seminar ishtirokchilari, xususan, Markaziy Osiyo va Janubiy Kavkaz davlatlaridan kelgan vakillar tomonidan investisiya loyihalarini amalga oshirishda korrupsiyaga qarshi kurashish sohasida o‘z mamlakatlari tajribasiga bag‘ishlangan taqdimotlar o‘tkaziladi.

Muloqotlar gibrid formatda – onlayn va oflayn shaklda bo‘lib o‘tmoqda.    

Seminar uch kun mobaynida yettita sessiyadan iborat tarkibda o‘tkaziladi. Muhokamalar natijasiga ko‘ra amaliy taklif va tavsiyalar ishlab chiqilishi kutilmoqda.  

Xalqaro tadbir tafsilotlari rasmiy sahifalarimiz orqali yoritib boriladi.

Korrupsiyaga qarshi kurashish agentligi

Axborot xizmati