Gruziyaning korrupsiyaga qarshi kurashish sohasidagi islohotlari bilan tanishish, bu borada ikki tomonlama hamkorlikni yo‘lga qo‘yish maqsadida joriy yilning 16-20-may kunlari Agentlik vakillaridan iborat delegatsiya mazkur davlatda xizmat safarida bo‘ldi. 

Ma’lumot uchun: Gruziya"Transparency International"ning 2021 yil "Korrupsiyani qabul qilish" xalqaro indeksida  45-o‘rinni egallagan.

Tashrif davomida Gruziya Hukumati administratsiyasi Korrupsiyaga qarshi kurashish bo‘yicha kotibiyati, Davlat xizmatlari byurosi, Davlat xaridlari agentligi,  Moliya vazirligi huzuridagi Tergov xizmati, Adliya oliy kengashi, shuningdek, prokuratura organlari va Davlat xavfsizlik xizmati tizimi rahbariyati va vakillari bilan uchrashuvlar tashkil etildi.

Muloqotlar mobaynida delegatsiya a’zolari Gruziyaning korrupsiyaga qarshi kurashish siyosati, korrupsiyaga qarshi kurashuvchi idoralar faoliyati, davlat xizmatchilarining mol-mulki va daromadlarini deklaratsiyalash, aholiga davlat xizmatlarini ko‘rsatish va davlat xaridlarini amalga oshirish jarayonlari bilan tanishdi.

Qayd etilishicha, Gruziya Hukumati administratsiyasi Korrupsiyaga qarshi kurashish bo‘yicha kotibiyati tarkibi davlat organlari va tashkilotlari (rahbariyati), fuqarolik jamiyati institutlari vakillari hamda mustaqil ekspertlardan iborat. Kotibiyat tomonidan har 2 yilda korrupsiyaga qarshi kurashish bo‘yicha strategiya qabul qilinadi hamda ijrosi ustidan monitoring amalga oshiriladi.

Mamlakatda davlat xizmatchilari mol-mulki va daromadlarini deklaratsiyalash tizimi, davlat xaridlari, jinoyat ishlari to‘liq elektron tarzda yuritiladi.

2009 yildan Moliya vazirligi Tergov xizmati tashkil etilgan bo‘lib, uning faoliyatiga soliq to‘lashdan bo‘yin tovlash, kontrabanda, bojxona qonunchiligini buzish, qalbaki to‘lov kartalarini tayyorlash, sotish, foydalanish, firibgarlik, o‘zlashtirish kabi 40 ta jinoyat taalluqlidir.
 

Uchrashuvlarda vakillarimiz ham O‘zbekistonda  so‘nggi yillarda korrupsiyaga qarshi kurashish bo‘yicha amalga oshirilayotgan choralar, shu jumladan, Korrupsiyaga qarshi kurashish agentligi faoliyati yuzasidan atroflicha ma’lumot berib o‘tdilar.

Tadbirlar davomida aniq soha va yo‘nalishlarda axborot almashish, ekspert-konsultativ hamkorlik qilish yuzasidan kelishuvga erishildi.

Korrupsiyaga qarshi kurashish agentligi
Axborot xizmati