Korrupsiyaga qarshi kurashish hududiy kengashlarining reyting baholash natijalariga ko‘ra, Xorazm viloyatida budjet mablag‘laridan noqonuniy foydalanish holatlari bo‘yicha mart oyida16 ta nazorat ob’ektida 13 mlrd. 962 mln. so‘m mablag‘lar maqsadsiz sarflangani aniqlanib, respublika miqyosida eng yomon natijani qayd etdi. 

Viloyat Korrupsiyaga qarshi kurashish hududiy kengashining bugun bo‘lib o‘tgan navbatdagi yig‘ilishida shu kabi yeorrupsiyaviy holatlar  Korrupsiyaga qarshi kurashish agentligi rahbariyati, Milliy kengash a’zolari, mutasaddi vazirlik va idoralar vakillari hamda Hududiy kengash a’zolari ishtirokida atroflicha muhokama etildi.

 Xususan, energetika tizimida uchrayotgan korrupsiyaviy jinoyatlar tahlili, shuningdek, ushbu tizimda korrupsiyaning oldini olish bo‘yicha amalga oshirilgan ishlar yuzasidan mas’ullarning axboroti eshitildi.

Qayd etilganidek, 2021 yilda respublikada energetika tizimida faoliyat yuritgan  94 nafar shaxsga nisbatan oid 63 ta korrupsiyaga oid jinoyat ishi sudlarga yuborilgan.

Mazkur jinoyatlarni sodir etganlarning 91 nafari tuman va shahar, 3 nafari esa viloyat darajasidagi mansabdor shaxslar bo‘lib, ular tomonidan davlat va jamiyat manfaatlariga jami 11,5 mlrd so‘m zarar yetkazilgan. Achinarlisi, viloyatda bunday jinoyatlarning 3 tasi “Xorazm hududiy elektr tarmoqlari” AJ xodimlari tomonidan sodir etilgan.

Bu kabi ko‘rsatkich va raqamlar viloyatdagi huquqni muhofaza qiluvchi organlar bilan birga Korrupsiyaga qarshi kurashish hududiy kengashi zimmasidagi mas’uliyatni yanada oshirishni talab etmoqda.

Shu bois tadbirda fuqarolik jamiyati institutlari, OAV imkoniyatlaridan samarali foydalangan holda korrupsiyaga qarshi kurashishga qaratilgan targ‘ibot-tashviqot ishlarini kuchaytirish, davlat organlari va tashkilotlari faoliyati ustidan faol jamoatchilik nazoratini ta’minlash, ularning hisobdorligini oshirishda hududiy Kengashning mas’uliyatini yanada oshirish, faolligini oshirish masalalariga alohida urg‘u berildi.

Muhokamalar jarayonida korrupsiya holatlarining kelib chiqish sabablari va ularni bartaraf etish yo‘llari yuzasidan ham o‘zaro fikr almashildi.

Jumladan, korrupsiya ko‘p sodir bo‘layotgan sohalar va tizimlar bo‘yicha muntazam eshituvlar tashkil etish, ularda korrupsiyaga qarshi kurashish jarayonlarini tahlil etish, bu boradagi faoliyatni takomillashtirish bo‘yicha amaliy takliflar ishlab chiqilib, mas’ullar zimmasiga aniq vazifalar yuklatildi.

Korrupsiyaga qarshi kurashish agentligi

 Axborot xizmati