Oʼzbekiston Respublikasi Prezidentining “Korrupsiyaga qarshi kurashish ishlarining samaradorligini reyting baholash tizimini joriy etish chora-tadbirlari toʼgʼrisida”gi qaroriga asosan, Korrupsiyaga qarshi kurashish agentligi tomonidan eksperiment tariqasida 24 ta davlat organlari va tashkilotlarining korrupsiyaga qarshi kurashishdagi samaradorligi tahlil qilinmoqda.

Xususan, reyting baholashni amalga oshirishda inson omilini bartaraf etish maqsadida maxsus elektron platforma – E-anticor.uz ishga tushirilib, mazkur platformadan foydalanish tartibi boʼyicha seminar oʼtkazildi.

Ushbu platformaga davlat organlari va tashkilotlari tomonidan 2021 yil va 2022 yilning 1-choragida korrupsiyaga qarshi kurashish boʼyicha amalga oshirilgan ishlari haqida maʼlumotlar kiritildi. 

Reyting baholash natijalari xolisligini taʼminlash maqsadida davlat organlari va tashkilotlari tomonidan elektron platformaga kiritilgan mazkur maʼlumotlar mustaqil ekspertlar guruhi tomonidan ham koʼrib chiqiladi.

Shunga koʼra, Аgentlik direktorining “Korrupsiyaga qarshi kurashish ishlarining samaradorligini reyting baholashni mustaqil amalga oshiruvchi ekspertlar guruhi tarkibini shakllantirish va uning faoliyatini tashkil etish tartibini tasdiqlash toʼgʼrisida”gi buyrugʼi ishlab chiqilib, Аdliya vazirligida davlat roʼyxatidan oʼtkazildi.

Аyni paytda ekspertlar guruhi tarkibi shakllantirilib,  E-anticor.uz platformasiga kiritilgan maʼlumotlarni tahlil qilish va baholash ishlari amalga oshirilmoqda. 

Bugun Аgentlik vakillari hamda ekspertlar guruhi aʼzolarining uchrashuvi tashkil etilib, mazkur jarayon bilan bogʼliq muhim masalalarning dastlabki muhokamasi boʼlib oʼtdi. 

Baholash bosqichlari va yakuniy natijalar Аgentlik rasmiy veb-sayti va OАVda batafsil yoritib boriladi. 

Korrupsiyaga qarshi kurashish agentligi

Аxborot xizmati