Korrupsiyaga qarshi hududiy kengashlar namunaviy eshituvlarining navbatdagisi Fargʻona viloyatida tashkil etildi. Yigʻilishda viloyatda xalq taʼlimi tizimidagi korrupsion jinoyatlar tahlili muhokamadagi asosiy masala boʻldi. 

Qayd etilganidek, viloyatda 2021-yilda tizim mansabdor shaxslarining 33 nafariga nisbatan 26 ta jinoyat ishi sudga yuborilgan. Ularning aksariyati oʻzlashtirish, firibgarlik, pora olish va berish koʻrinishidagi jinoyatlarni sodir qilgan. Mazkur jinoyatlarga qoʻl urgan shaxslarning barchasi tuman va shahar miqyosidagi xalq taʼlimi boʻlimlarining xodimlari hisoblanadi.

Muhokama davomida shu kabi qonunbuzilish holatlarining kelib chiqish sabablari va ularni bartaraf etish yoʻllari batafsil muhokama qilindi.Mavzu yuzasidan viloyat xalq tizimi masʼullarining axboroti eshitildi. 

Yigʻilishda hududiy Kengash tomonidan tizimda korrupsiyaga sabab va shart-sharoitlarni aniqlash maqsadida viloyat boshqarmasi, tuman (shahar) xalq taʼlimi boʻlinmalari hamda tumanlardagi 10 dan ortiq maktablarda oʻrganishlar olib borilgani qayd etildi. Oʻrganishlar davomida oʻqituvchilar, ota-onalar va oʻquvchilar bilan suhbatlar oʻtkazilgan va soʻrovnomalar tashkil etilgan.

Natijada ochiqlikni taʼminlash, ishga joylashish, korrupsiyaga qarshi targʻibotni toʻgʻri yoʻlga qoʻyish, aloqa kanallarining ishga tushirilmagani kabi tizimli kamchiliklar aniqlangani maʼlum qilindi.

Hududiy kengash ishchi guruhi tomonidan ushbu muammolarni bartaraf etish boʻyicha ham takliflar bildirishdi.

Yigʻilishda, shuningdek, hududiy Kengash faoliyatini takomillashtirish boʻyicha tavsiyalar berildi. 

Jumladan, Kengashning korrupsiyaviy islohotlar bajarilishini monitoring qilish, davlat organlari va tashkilotlari, fuqarolik jamiyati institutlari, OAV bilan  hamkorlik, korrupsiyaga qarshi kurashish jarayoniga aholining barcha qatlamlarini keng jalb etish, bu borada targʻibot-tashviqot ishlarini olib borishdagi faoliyatini kuchaytirishga eʼtibor qaratish lozimligi taʼkidlandi.

Shu bilan birga hududga biriktirilgan Milliy kengash aʼzolari bilan oʻzaro aloqani yoʻlga qoʻyish, oʻz navbatida, biriktirilgan vakillarning daxldorligini oshirish lozimligi belgilandi. 

Hududiy kengash  korrupsiyaga oid jinoyatlar, byudjet mablagʻlaridan maqsadsiz foydalanish holatlarining oldini olish, davlat organlari va tashkilotlari faoliyatining ochiqligini taʼminlash, umuman, sohaga oid qonunchilik hujjatlari ijrosini taʼminlashda mavjud imkoniyatlardan oqilona foydalanishi zarurligi alohida taʼkidlandi.

Eshituv soʻnggida muhokama etilgan masalalar yuzasidan aniq amaliy takliflar ishlab chiqilib, viloyatda aksilkorrupsiya siyosatiga oid islohotlarning hayotga samarali tatbiq etish yuzasidan muhim  maqsad va vazifalar belgilab olindi.

Korrupsiyaga qarshi kurashish agentligi

Axborot xizmati