Joriy yilning 23-27-may kunlari korrupsiyaga qarshi kurashish va uning oldini olish sohasida Oʻzbekiston va Latviya oʻrtasida oʻzaro hamkorlik aloqalarini rivojlantirish, oʻzaro tajriba almashish maqsadida Korrupsiyaga qarshi kurashish agentligi direktori oʻrinbosari boshchiligidagi delegatsiya Latviya Respublikasida amaliy tashrif bilan boʻldi.

Tashrif davomida Latviyaning Korrupsiyaning oldini olish va unga qarshi kurashish byurosi (KNAB), Tashqi ishlar vazirligi Iqtisodiy aloqalar va siyosatni rivojlantirish boʻyicha hamkorlik departamenti, Davlat boshqaruvi maktabi, Riga Oliy yuridik maktabi hamda Davlat daromadlari xizmati rahbariyati va vakillari bilan uchrashuvlar tashkil etildi.

Uchrashuvlar davomida Latviya Respublikasining korrupsiyaga qarshi kurashish siyosati, vakolatli idoralar faoliyati, shuningdek, davlat xizmatida manfaatlar toʻqnashuvining oldini olish va daromadlarni deklaratsiyalash tizimi, davlat xizmatchilari va aholini korrupsiyaga qarshi kurashish boʻyicha oʻqitish tajribasi oʻrganildi.

Xususan, Korrupsiyaning oldini olish va unga qarshi kurashish byurosi bilan boʻlib oʻtgan uchrashuv chogʻida Latviyada normativ-huquqiy hujjatlar, ularning loyihalari hamda yirik qurilish loyihalarini korrupsiyaga qarshi ekspertizadan oʻtkazish tartibi va amaliyoti, korrupsiyaviy xavf-xatarlarni baholash tartibi va yoʻnalishlari, davlat xaridlari jarayonlarini monitoring qilish, davlat xaridlari bilan bogʻliq huquqbuzarliklarni oʻrganish yuzasidan maʼlumot almashildi.

Shuningdek, delegatsiya aʼzolari davlat xizmatida manfaatlar toʻqnashuvini bartaraf etish, jinoiy huquqbuzarliklarni aniqlash va oldini olish, korrupsiya toʻgʻrisida xabar berish, davlat xizmatchilarini korrupsiyaga qarshi oʻqitish va xalqaro hamkorlikni rivojlantirish yoʻnalishlarida qizgʻin muloqotlar olib bordilar.

Latviya Tashqi ishlar vazirligi Iqtisodiy aloqalar va siyosatni rivojlantirish boʻyicha hamkorlik departamenti hamda Oʻzbekistonning Latviyadagi elchixonasi vakillari ishtirokida oʻtkazilgan tadbir davomida Hamkorlik departamenti va Agentlik oʻrtasida hamkorlik aloqalarini oʻrnatish, korrupsiyaga qarshi kurashish sohasida tajriba almashish, jumladan, aniq sohalarda qoʻshma loyihalar ishlab chiqish va amalga oshirish, oʻquv dastur va treninglar tashkil etish istiqbollari koʻrib chiqildi.

Latviya Davlat boshqaruvi maktabi direktori Agita Kalvinya bilan tashkil etilgan uchrashuvda delegatsiya aʼzolari korrupsiyaga qarshi oʻqitish tizimi, ularning davomiyligi hamda mazkur kurslarga ekspert va mutaxassislarni jalb qilish amaliyoti borasida fikr almashdilar.

Maʼlumot uchun: Davlat boshqaruvi maktabi 1993-yilda tashkil etilgan boʻlib, uning asosiy faoliyatiga davlat xizmatchilarining malakasini oshirish boʻyicha tegishli mavzu va yoʻnalishlarda kurslar tashkil etish hamda ularni tizimli ravishda oʻqitish kiradi.

Oʻz navbatida, Agentlik delegatsiyasi rahbari tomonidan Oʻzbekiston Respublikasi Prezidentining 2021-yil 6-iyuldagi 5177-son Qaroriga muvofiq shakllantirilgan davlat xizmatchilarini “halollik vaksinasi” tamoyili asosida korrupsiyaga qarshi oʻqitish, odob-ahloq qoidalari va manfaatlar toʻqnashuvi boʻyicha maxsus kurslarda oʻqitish tizimi toʻgʻrisida maʼlumot berildi.

Agentlik delegatsiyasi va Riga Oliy yuridik maktabi rahbariyati oʻrtasida boʻlib oʻtgan muloqotlar davomida tomonlar Riga Oliy yuridik maktabida stajirovkalarni oʻtash, xususan, Agentlik xodimlarining mazkur maktab tomonidan tashkil etilayotgan 12 haftalik Yevropa huquqi va iqtisodiyoti boʻyicha ilgʻor dasturda ishtirok etishi yuzasidan kelishuvga erishdilar.

Davlat daromadlari xizmati vakillari ishtirokidagi uchrashuvda davlat xizmatchilarining daromad va mol-mulklari toʻgʻrisidagi deklaratsiyalarini qabul qilish, qayta ishlash, tekshirish va deklaratsiya maʼlumotlarini ochiq eʼlon qilish masalalari muhokama qilindi. Qolaversa, tashkilotning bojxona postlarida korrupsion xavf-xatarlarni masofaviy boshqarish boʻyicha faoliyati bilan tanishildi.

Korrupsiyaga qarshi kurashish agentligi

Axborot xizmati